ރާއްޖޭގެ 8 ވަނަ ރައީސުލްޖުމްހޫރިއްޔާގެ މަގާމަށް ޑރ. މުހައްމަދު މުޢިއްޒު، އަދި ނާއިބު ރައީސް އަކަށް ހުސައިން މުހައްމަދު ލަތީފް އިންތިހާބު ވެވަޑައިގެންފިއެވެ. 

މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި ބައިވެރި 8 ކެންޑިޑޭޓުންގެ ތެރެއިން އެއްވެސް ކެންޑިޑޭޓަކަށް 50 އިންސައްތަ ލިބިވަޑައިގެންފައި ނުވާތީ ދެވަނަ ބުރުގެ ވޯޓުލުން ބާއްވާފައި ވާއިރު، ދެވަނަ ބުރުގައި ވާދަކުރެއްވީ ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ދެވަނަ އަށް އެންމެ ބޮޑު ސިޔާސީ ޕާޓީ ޕީޕީއެމް/ ޕީއެންސީގެ ރިޔާސީ ކެންޑިޑޭޓް އަދި މާލެސިޓީ ކައުންސިލްގެ މޭޔަރ ޑރ މުހައްމަދު މުއިއްޒު އެވެ. 

އިންތިހާބުގެ ދެވަނަ ބުރުގެ ވޯޓުލުން ނިމި، ގިނަ ވޯޓު ފޮށީގެ ނަތީޖާ މިހާރު އިއުލާން ކޮށްފައިވާއިރު، 17,760 ވޯޓަށްވުރެ ގިނަ ވޯޓުގެ ތަފާތުން ކުރީގައި ޑރ. މުޢިއްޒުއެވެ. 

Advertisement

އެގޮތުން މުޢިއްޒަށް 125,889 ވޯޓު ލިބިފައިވާއިރު އެއީ %53.8 އިންސައްތައެވެ. އަދި ރައީސް ޞާލިހަށް 108,124 ވޯޓު ލިބިފައި ވާއިރު އެއީ %46.2 އެވެ.  

އެހެންކަމުން ކުރިއަށް އޮތް ފަސް އަހަރު ރާއްޖޭގެ ރައީސުލްޖުމްހޫރިއްޔާ ކަމުގެ މަގާމުގައި ހުންނަވާނީ ޕީޕީއެމް ޕީއެންސީގެ ކެންޑިޑޭޓް ޑރ. މުހައްމަދު މުޢިއްޒު ކަން މިވަނީ ކަށަވަރުވެފައެވެ.