ކުރީގެ ރައީސް އަދި ޕީޕީއެމްގެ ލީޑަރ ރައީސް ޔާމީން އަބްދުލްގައްޔޫމް ދާދި ދެންމެއަކު ގެއަށް ބަދަލުކޮށްފިއެވެ.

ރައީސް ޔާމީން ގެއަށް ބަދަލުކުރި އިރު އެމަނިކުފާނުގެ ގިނަ އަދަދެއްގެ ސަޕޯޓަރުން ވަނީ، މަރުހަބާ ދަންނަވަން އެމަނިކުފާނުގެ ގެ ހުންނަ ސަރަހައްދު ފުރާލާފައެވެ. އެންމެންގެ މޫނު މަތިން އުފާވެރި ކަމުގެ ހިނިތުންވުމާއި ކަރުނަ ދިޔައީ ފެންނަމުންނެވެ. 

އަދި ރައީސް ޔާމީން ވަނީ އެމަނިކުފާނުގެ އިސްތިގުބާލުގައި ތިއްބެވި ލީޑަރޝިޕްގެ ބޭފުޅުންނާއި ސަޕޯޓަރުންނާއި ސަލާމް ކުރައްވާފައެވެ. 

މިކަމާއި ގުޅިގެން އެމަނިކުފާނުގެ ގާނޫނީ ވަކީލު މީޑިއާއަށް މައުލޫމާތު ދެއްވަމުން ވަނީ، ވ އާރަށް މައްސަލާގައި އެމަނިކުފާނު 11 އަހަރަށް ޖަލަށް ލާން ހުކުމް ކޮށްފައިވާއިރު، މިހާރު ހައިކޯޓުގައި އޮތް އެ މައްސަލައިގެ އިސްތިއުނާފު ވޭހާވެސް އަވަހަށް ނިންމައި ހުކުމް ކުރުމަށް އެދިލައްވާފައެވެ. 

ރައީސް ޔާމީން ގެއަށް ބަދަލު ކޮށްފައިވާއިރު، އިއްޔެ ބޭއްވުނު ރިޔާސީ އިންތިހާބުގެ ދެވަނަ ބުރުގެ ވޯޓު ކާމިޔާބުވެވަޑައިގެން ދިވެހި ރާއްޖޭގެ ރައީސުލްޖުމްހޫރިއްޔާ ކަމުގެ މަގާމަށް ކުރިއަށް އޮތް 5 އަހަރަށް ހޮވިވަޑައިގެން އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުއަށް އިންތިހާބު ކާމިޔާބުވެވަޑައިގަތުމަށްފަހު ބޭއްވި ފުރަތަމަ ނޫސްވެރިންގެ ބައްދަލުވުމުގައި އެންމެ ފުރަތަމަކަށް ޕީޕީއެމް ލީޑަރ އަދި ކުރީގެ ރައީސް ޔާމީނު އަބްދުލްގައްޔޫމް ގެއަށް ބަދަލު ކުރެއްވުމަށް ވަނީ ގޮވާލައްވަާފައެވެ. 

"އަޅުގަނޑު މި ދަނޑިވަޅުގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙަށް ވަރަށް އިޚްލާސްތެރިކަމާއި އަދަބުވެރިކަމާއި އެކީގައި ދަންނަވާލަން އަޅުގަނޑުމެންގެ ލޮބުވެތި ރައީސް ރައީސް ޔާމީން ގެއަށް ބަދަލުކޮށްދެއްވުމަށް" ރޭގެ ނޫސްވެރިންގެ ބައްދަލުވުމުގައި މުޢިއްޒު ވިދާޅުވިއެެވެ. 

ޑރ. މުއިއްޒު ވިދާޅުވީ ލިބުނު ކާމިޔާބީއާއި އެކު، އަވަސްވެގަންނާނީ ރައީސް ޔާމީން މިނިވަން ކުރުމަށް ކަމަށެވެ.