ދިވެހިރާއްޖޭގެ އިންތިހާބީ އައު ރައީސް، ޑރ. މުހައްމަދު މުއިއްޒުގެ ސަރުކާރުގައި "ދަ ޑިމޮކްރެޓްސް" ބައިވެރިވާނެ ކަމަށް އެ ޕާޓީގެ މުއައްސިސް ހަސަން ލަތީފް ވިދާޅުވެއްޖެއެވެ.

މިކަން ހާމަކުރައްވައި ހަސަން ލަތީފް ކުރެއްވި ޓްވީޓެއްގައި ވިދާޅުވެފައިވަނީ އިއްޔެ ބޭއްވި ރިޔާސީ އިންތިހާބު ކާމިޔާބު ކުރެއްވި އިދިކޮޅު ޕީޕީއެމް/ޕީއެންސީގެ ކެންޑިޑޭޓް މުއިއްޒު އެކުލަވައިލައްވާ ސަރުކާރުގައި ޑިމޮކްރެޓްސް އިން ބައިވެރިވާނެ ކަމަށެވެ. 

ރިޔާސީ އިންތިހާބުގެ ފުރަތަމަ ބުރުގައި ވާދަކުރި ޑިމޮކްރެޓްސްގެ ކެންޑިޑޭޓް ހުޅުދޫ ދާއިރާގެ މެމްބަރު އިލްޔާސް ލަބީބް ވަނީ ތިންވަނަ އަށް އެންމެ ގިނަ ވޯޓު އެ އިންތިހާބުގައި ހޯދާފަ އެވެ. އެއީ 15،000 ވޯޓެވެ. ނަމަވެސް، ދެ ވަނަ ބުރުގައި އެ ޕާޓީން ނިންމީ އެއްވެސް ކޮޅަކަށް ނޭރުމަށެވެ.

ޑިމޮކްރެޓްސްގެ ބައެއް އިސް ބޭފުޅުންނާއި ގޮފިތަކުންނާއި އާންމު މެންބަރުން ދެ ވަނަ ބުރުގައި މުއިއްޒަށް ތާއީދުކުރިއެވެ.

ކަންމިހެން އޮތް އިރު ޑިމޮކްރެޓްސް އަށް ނިސްބަތްވާ އެންމެ އިސްފަރާތް ކަމަށްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިއްޔެ އެމްޑީޕީގެ ޗެއާޕާސަން ފައްޔާޒް އިސްމާއީލަށް ފޮނުއްވި މެސެޖްގައި އެމަނިކުފާނު އަލުން ޕާޓީއާ ގުޅިވަޑައިގަންނަވަން ބޭނުންފުޅުވާ ކަަމަށް ވަނީ ވިދާޅުވެފައެވެ. އަދި "އެމްޑީޕީގެ ގައުމީ މަޖިލީހުގެ 50 ޕަސެންޓް ތާއީދު އޮތް ނަމަ ގުޅެން ބޭނުންވާ" ކަމަށް ވިދާޅުވެ، ފައްޔާޒް ވަނީ އެ މެސެޖް އެ ޕާޓީގެ ވަޓްސް އެޕް ގްރޫޕްގައި ހިއްސާ ކުރައްވައިފައެވެ.