ރިޔާސީ އިންތިހާބުގެ ދެވަނަބުރު ކާމިޔާބު ކުރައްވާ އަލަށް އިންތިޚާބުވެވަޑައިގެން އައު އިންތިހާބީ ރައީސް ޑރ. މުހައްމަދު މުއިއްޒުއަށް ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒާއި ވަލީއަހުދު މުހައްމަދު ބިން ސަލްމާން ތަހުނިޔާ ފޮނުއްވައިފިއެވެ.  

ސައުދީ އަރަބިއްޔާގެ ސަރުކާރުގެ ރަސްމީ ޓުވިޓާ އެކައުންޓުން ކުރި ޕޯސްޓެއްގައި ވަނީ ރަސްގެފާނު އަދި ވަލީއަހުދުގެ ނަންފުޅުގައި ޑރ.މުއިއްޒަށް މަރުހަބާ އާއި ތަހުނިޔާ ދަންނަވައިފައެވެ.

ސައުދީ ރަސްގެފާނާއި ވަލީއަހުދުގެ އިތުރުން ސައުދީން ރާއްޖެ އަށް ކަނޑައަޅުއްވާފައި ހުންނަވާ ސަފީރު މެޓްރެކް އަލް ދޮސާރީ ވެސް ވަނީ މުއިއްޒަށް މަރުހަބާ ދަންނަވައިފައެވެ.

މުއިއްޒަށް މަރުހަބާ ދެންނެވުމަކީ ލިބޭ ބޮޑު އުފަލެއް ކަމުގައި ވިދާޅުވެ ދޮސާރި ކުރެއްވި ޓުވީޓެއްގައި ވަނީ މަގާމުގެ މަސްއޫލިއްޔަތު ފުރިހަމަ އަށް އަދާކުރެއްވުމުގައި ޑރ މުއިއްޒަށް ކާމިޔާބީ އަށް އެދިވަޑައިގަންނަވާ ކަމަށެވެ. 

މީގެ އިތުރުން ސަފީރު ވަނީ ރާއްޖެ އާއި ސައުދީ އަރަބިއްޔާއާ ދެމެދުގައި އޮތް ގުޅުން ކުރިއަށް އޮތް ދުވަސްތަކުގައި އިތުރަށް ބަދަހިކުރައްވާނެ ކަމުގެ ޔަގީންކަން ދެއްވައިފައެވެ.

ދެވަނަ ބުރުގެ ވަގުތީ ނަތީޖާ އަށް ބަލާ އިރު، އިދިކޮޅު ކެންޑިޑޭޓު ޑރ. މުހައްމަދު މުއިއްޒު ވަނީ 129،159 ވޯޓު ހޯއްދަވައިފައެވެ. މުއިއްޒާ ވާދަކުރެއްވި އެމްޑީީގެ ރިޔާސީ ކެންޑިޑޭޓް ރައީސް އިބްރާޙިމް މުހައްމަދު ސޯލިހަށް ލިބިވަޑައިގެންފައި ވަނީ 109،868 ވޯޓެވެ. މިއީ 19،291 ވޯޓުގެ ތަފާތެކެވެ.