ކުރީގެ ރައީސް މުޙައްމަދު ނަޝީދަށް ދިން ހަމަލާގެ އިންސާފު މިހާރު އިންތިޚާބުވެފައިވާ ސަރުކާރުން ހޯދައިދޭނެކަމަށް އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.

ޑރ މުޢިއްޒު މިހެން ވިދާޅުވީ ރޭ އިންތިޚާބީ ރައީސް ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ޑރ މުޢިއްޒު ވިދާޅުވީ މަޖީދީ މަގުގައި ރައީސް ނަޝީދަށް ދިން އުދުވާނީ ހަމަލާގެ މައްސަލަ މިސަރުކާރުން ބަލައިފައި ނުވާ ކަމަށެވެ.

"އަޅުގަނޑުމެންގެ ސަރުކާރެއްގައި އެމަނިކުފާނަށް ވެސް އިންސާފު ހޯދައިދޭނަން" އިންތިޚާބީ ރައީސް ޑރ މުޢިއްޒު ވިދާޅުވިއެވެ.

ރައީސް ނަޝީދަށް އެމަނިކުފާނު ދިރިއުޅުއްވާ ގެކޮޅު ކައިރީގައި ބޮމެއް ގޮއްވާލައިގެން ހަމަލާދީފައިވަނީ 2021 ވަނަ އަހަރުގެ މެއި މަހުގެ 21 ވަނަ ދުވަހުއެވެ.

ހަމަލާއަށް 2 އަހަރަށް ވުރެ ގިނަ ދުވަސްވެފައިވާއިރު އަދިވެސް އެމައްސަލައިގައި ރައީސް ނަޝީދަށް އިންސާފު ލިބިވަޑައެއް ނުގަނެއެވެ.

އެމައްސަލައާއި ގުޅިގެން އެންމެ ފަހުން ބޭއްވި ޝަރީޢަތުގެ މަޖިލީހުގައި ހއ. މޮޅަދޫ، ބަހާރުގޭ، އަބްދުالله އަލީ މަނިކުގެ މައްޗަށް ކުރި އެހަމަލާދިނުމުގައި ބައިވެރިވިކަމުގެ  ތުހުމަތުތައް ސާބިތުވެ، ފަސް އަހަރުގެ ޖަލު ހުކުމެއް ވަނީ އިއްވައިފައެވެ.

އޭނާއާއެކު ދެން ދައުވާ އުފުލީ ހއ. ހޯރަފުށި، އަލަނާސިގެ، މުހައްމަދު ތަސްލީމްގެ މައްޗަށެވެ. ނަމަވެސް ތަސްލީމްގެ މައްޗަށް އުފުލި ދައުވާތައް ސާބިތެއް ނުވާކަމަށް ވަނީ ނިންމައިފައެވެ. ނަމަވެސް ފާހަގަ ކޮށްލަން ޖެހޭ ކަމަކީ ފުލުހުން ކުރިން ބުނެފައިވާ ގޮތުން ތަސްލީމަކީ ބޮން ގޮއްވައިލުމުގައި އެންމެ އިސް ދައުރެއް އަދާކުރި މީހާއެވެ.