އެމަނިކުފާނުގެ ވެރިކަމެއްގައި އޮންނާނީ ޕްރޯ- މޯލްޑިވްސް ޚާރިޖީ ސިޔާސަތުކަމަށާއި އެއަށް ތަބާވާ ހުރިހާ ގައުމަކާއި އެކު ގުޅުން އޮންނާނެ ކަމަށް އިންތިޚާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ދިވެހިރާއްޖޭގެ ރައީސުލްޖުމްހޫރިއްޔާގެ މަގާމަަށް ޑރ. މުޢިއްޒު އިންތިޚާބުވެ ވަޑައިގެންނެވުމާއި ގުޅިގެން އިންތިޚާބުވުމާ ގުޅިގެން އުފާ ފާޅުކުރުމަށް ރޭ ބޭއްވި ޖަލްސާގައި ވާހަކަފުޅު ދައްކަވަމުން މުޢިއްޒު ވިދާޅުވީ އެމަނިކުފާނު ރައީސް ކަމަށް އިންތިހާބު ވުމާއި ގުޅިގެން ރާއްޖޭގައި ތިބި އެކި ގައުމު ތަކުގެ ސަފީރުން ބައްދަލު ކުރެއްވުމަށް އެދި ލައްވަމުންދާ ކަމަށެވެ.

"މި ޓްރާންސިޝަން ޕީރިއަޑުގެ ތެރޭގައިވެސް އެކި އެކި ބޭރު ގައުމުތަކުގެ ސަފީރުން ބައްދަލުވުންތަކަށް އެދެމުން އެބަ ދޭ، ކަނޑައެޅިފައި އޮންނަ އުސޫލަކުން ހަމަ ތަކުން އެ ބޭފުޅުންނާ ބައްދަލުކުރާނަން، އެންމެ އަވައްޓެރި ގައުމުތަކާވެސް ބައްދަލުކުރާނަން" އިންތިހާބީ ރައީސް ޑރ. މުއިއްޒު ވިދާޅުވިއެވެ.

Advertisement

މިއާއެކު ޑރ. މުއިއްޒު ވިދާޅުވީ އެމަނިކުފާނުގެ ވެރިކަމެއްގައި އިސްކުރައްވާނީ ދިވެހި ގައުމުގެ މަސްލަހަތު ހިމާޔަތް ކުރެވޭ ސިޔާސަތުކަމަށާއި އެ ޚާރިޖީ ސިޔާސަތު ވާނީ ޕްރޯ މޯލްޑިވްސް ސިޔާސަތަށް ކަމަށެވެ.

ޑރ. މުއިއްޒު ވިދާޅުވީ ދުނިޔޭގެ ހުރިހާ ގައުމަކީ ދިވެހިންގެ އަމިއްލަ ވަންތަކަމަށް އިހްތިރާމް އަދާކުރަން ބޭނުންވާނެ އަދި ދިވެހިންނަށްވެސް ދިވެހިންގެ މިނިވަންކަން ހިމާޔަތްކުރުމުގެ ހައްގު ލިބިގެންވާނެކަން ގަބޫލުކުރާނެ ގައުމުތައްކަމަށް ވާނެކަމަށް ގަބޫލުކުރައްވާކަމަށެވެ.

"އަޅުގަނޑުމެންގެ އިހްސާސްތަކާ ދެކޮޅަށް ބޭރު ސިފައިންނަށް މިގައުމުގައި ނުތިބެވޭނެ، އަޅުގަނޑާ ބައްދަލުކުރަން ވަޑައިގަންނަ ސަފީރަށް ދަންނަވަން އޮތީ މި ހަމަތަކުގެ މަތިން އަޅުގަނޑުމެންނާ ވަރަށް ގާތް ގުޅުން އޮންނާނޭ" އިންތިޚާބީ ރައީސް ޑރ މުއިއްޒު ވިދާޅުވި އެވެ.

މުޢިއްޒު މިފަދައިން ވިދާޅުވެފައި މިވަނީ އެމަނިކުފާނަކީ ޕްރޯ ޗައިނާ ކެންޑިޑޭޓެއް ކަމަށް ބޭރުގެ މީޑިއާ ތަކުން ސިފަކޮށް ވާހަކަދައްކަވަމުންދާ ދަނޑިވަޅެއްގައެވެ.