ހިނގަމުން މިދާ ސަރުކާރުގެ މައްޗަށް އެހެން ބައެއްގެ ބާރު އޮތް ނަމަވެސް ޕީޕީއެމް/ޕީއެންސީގެ ވެރިކަމެއްގައި އެމަނިކުފާނުގެ މައްޗަށް އެއްވެސް ބައެއްގެ އެއްވެސް ބާރެއް ނުހިންގޭނެ ކަމަށާއި ހިނގާނީ ރައްޔިތުންގެ ބާރު ކަމުގައި އިންތިހާބީ ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ރިޔާސީ އިންތިހާބުގެ ދެވަނަބުރުން ލިބިވަޑައިގެން ކާމިޔާބީ ފާހަގަ ކުރުމުގެ ގޮތުން ރޭ ސޯޝަލް ސެންޓަރުގައި ބޭއްވި ރައްޔިތުންގެ ބައްދަލުވުމުގައި ވާހަކަދައްކަވަމުން ޑރ މުއިއްޒު ވިދާޅުވީ، ރައްޔިތުންނަށް ހިދުމަތް ކުރުމަށް އެކުލަވާލާ ކެބިނެޓް ވާނީ ހީވާގި ޓީމެއް ކަމަށާއި ކެބިނެޓްގައި ތިއްބަވާނީ މި މަސައްކަތް ކުރެއްވޭނެ ހީވާގި، ތަޖުރިބާ ހުރި، ތައުލީމީ ބޭފުޅުން ކަމަށެވެ.
ރެއާއި ދުވާލު މަސައްކަތް ކުރައްވާނެ އެ ބޭފުޅުން. ކޮންމެ ގަޑިއަކު ވަކި ކަމެއް ހިނގަނީ ކިހިނެއްތޯ އަހާލަން ފޯނު ކޮށްފިއްޔާ ޔަގީނުން ވެސް ފޯނު ނަންގަވާނެ. އެހެންވީމަ އެހާ ހީވާގި ބޭފުޅުން ތިއްބަވާނީ. ކުންފުނިތައް ހިންގަވަން ވެސް ތިއްބަވާނީ އެފަދަ ބޭފުޅުން
އިންތިޚާބީ ރައީސް ޑރ މުހައްމަދު މުއިއްޒު
މީގެ އިތުރުން 33 ބިލިއަން ރުފިޔާގެ ދަރަންޏާ އެކު، ކުންފުނިތައް ވަނީ ބަނގުރޫޓުވެފައިވާކަން ފާހަގަކުރައްވައި މުއިއްޒު ވިދާޅުވީ، ކުންފުނިތަކުގެ ވެރިންނަށް ވެސް އައްޔަން ކުރައްވާނީ އެ ތަންތަން ނަގާ ކޮޅަށް ޖެހޭނެ ވަރުގެ މަސައްކަތް ކުރެއްވޭނެ ބޭފުޅުން ކަމުގައެވެ.
މުއިއްޒު ވަނީ ރާއްޖެއަށް ކުރިމަތިވެފައިވާ ނާޒުކު ދަނޑިވަޅުގައި މުސްތަގުބަލު އުޖާލާ ކުރުމަށާއި ދަރިންގެ ހައްގުގައި މިނިވަންކަން ޔަގީން ކުރުމަށްޓަކައި ރައްޔިތުން ކުރެއްވި ގައުމި މަސައްކަތަށް ހިތުގެ ފުންމިނުން ޝުކުރު ދަންނަވައިފައެވެ.
މިހާރު ކަނޑައެޅިފައި އޮތް ގޮތުން ނަމަ، މުއިއްޒު ވެރިކަމުގެ ހުވާ ކުރައްވާނީ ނޮވެމްބަރު މަހުގެ 17 ވަނަ ދުވަހުއެވެ. އަދު ޓްރާސްސިޝަނަލް ކަންކަމަށް އުފައްދާފައިވާ ކޮމެޓީގެ ޗެއާ އަކީ އަބްދުއްރަހީމެވެ. ސަރުކާރުން ވަނީ ޓްރާންސިޝަނަލް މުއްދަތުގައި ފުރިހަމަ އެއްބާރުލުން ދޭނެ ކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
