ކޮންމެ އީދެއްގައި މުޅި ރާއްޖޭގެ ކަންކޮޅުތަކުން ތަކުބީރުގެ އަޑު ގުގުމާލާނެ ކަމުގައި އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިޚާބުގެ ދެވަނަ ބުރުގައި ލިބުނު ކާމިޔާބީ ފާހަގަކުރުމުގެ ގޮތުން، ރޭ ސޯޝަލް ސެންޓަރުގައި ބޭއްވި ރައްޔިތުންނާއި ބައްދަލުވުމުގައި ވާހަކަދައްކަވަމުން އިންތިޚާބީ ރައީސް. ޑރ މުޙައްމަދު މުޢިއްޒު ވިދާޅުވީ، ދިވެހިންނަކީ މާތްވެގެންވާ އިސްލާމްދީނަށް ލޯބިކުރާ، އިސްލާމީ ވަންތަކަން ދިރުވާ އާލާކުރަން ބޭނުންވާ ބައެއް ކަމަށެވެ.   

އެގޮތުން ފާއިތުވި ޢީދުގައި މާލެ ސިޓީގައި ދިއްލި ބޮކިތަކުންނާއި ގުގުމާލި ތަކުބީރުގެ އަޑުތަކުން ރައްޔިތުންގެ ހިތަށް ލިބުނު އުފާ، އެފަރާތްތަކުން ހާމަކުރަމުންދިޔަ ޝުއޫރުތަކުން ވަރަށް ރަނގަޅަށް ހާމަވެގެން ގޮސްފައިވާކަމަށް ޑރ މުއިއްޒު ވިދާޅުވި އެވެ.

އެގޮތުން ފާއިތުވި ޢީދުގައި އެކަން މާލޭސިޓީގައި ކުރިއަށް ގެންދިޔަ ނަމަވެސް ކުރިއަށް ހުރި ޢީދުތަކުގައި އެ މަސައްކަތް ރާއްޖޭގެ ހުރިހާ ސިޓީތަކާއި ކޮންމެ އަތޮޅެއްގެ ވެރިކަން ކުރާ ރަށުގައި ކުރިއަށް ގެންދާނެކަމުގައި ޑރ މުޢިއްޒު ވިދާޅުވިއެވެ.

 މިއަހަރުގެ އަޟްހާ އީދަށް މާލޭގެ އެކި ހިސާބުތަކުގައި ސްމާޓް ސްޓްރީޓް ލައިޓްތައް ދިއްލާލައި އެ ލައިޓްތަކުން ތަކުބީރުގެ އަޑު އިވޭ ގޮތް މާލެ ސިޓީ ކައުންސިލުން ހެދީ މިދިޔަ ޖޫން މަހުގެ ތެރޭގައެވެ.

މި ޑިޒައިންތަކަކީ މާލެ ސިޓީ ކައުންސިލުން އަމިއްލަ އަށް ތައްޔާރު ކުރި ޑިޒައިންތަކެކެވެ. މާލެ ސިޓީ ދިއްލާލައި ތަކުބީރުގެ އަޑުން ގުގުމާލަން ނިންމީ މާލޭގައި އީދެއް ފާހަގަ ކުރާ ކަން އިހްސާސްކޮށް ދިނުމާއި މާލޭގައި ދިރިއުޅޭ ރައްޔިތުންނަށް އީދުގެ އުފާވެރި ކަން ގެނެސް ދިނުމުގެ ބޭނުމުގައެވެ.

މާލެ ތެރެ ޒީނަތްތެރިކުރުމުގެ ގޮތުން ލައިޓްތައް އެންމެ ގިނަ އިން ހަރު ކުރީ މާލޭގެ ރިންގް ރޯޑް މަގުގައި ނުވަތަ ބޮޑުތަކުރުފާނު މަގުގައެވެ.

ރިންގްރޯޑްގެ އިތުރުން މަޖީދީ މަގާއި ޖުމްހޫރީ މައިދާން ފަދަ ތަންތަނުގައި ލައިޓް ހަރު ކުރިއެވެ. މި ލައިޓްތަކުގެ އިތުރުން މަގު ހުރަސްކޮށް، "ގިޑިގެ" ގޮތަށް ލައިޓްތަކެއް ވެސް ހަރުކޮށްފައިވެއެވެ.

އަޟްހާ އީދުގައި މާލެ ތެރެ ޒީނަތްތެރި ކުރުމުންނާއި ތަކުބީރުގެ އަޑުން ގުގުމާލުމާ ގުޅިގެން ގިނަ ބައެއްގެ ތައުރީފް އޭރު ސިޓީ ކައުންސިލަށް ލިބިފައިވެއެވެ.