އިންތިޚާބީ ރައީސް ޑރ. މުހައްމަދު މުއިއްޒަށް، ޗައިނާގެ ރައީސް ޝީ ޖިންޕިން މަރުހަބާ ވިދާޅުވެއްޖެ އެވެ.

ހޮނިހިރު ދުވަހު ބޭއްވުނު ރިޔާސީ އިންތިޚާބު ޕީޕީއެމް/ޕީއެންސީގެ ކެންޑިޑޭޓް އަދި މާލެސިޓީ ކައުންސިލްގެ މޭޔަރ ޑރ މުޢިއްޒު ކާމިޔާބު ކުރެއްވުމާއި ގުޅިގެން ޗައިނާ ރައީސް ގެ ތަހުނިޔާ މުޢިއްޒަށް ފޮނުއްވައި، އެ ގައުމުން ރާއްޖެ ކަނޑައަޅުއްވާފައި ހުންނަވާ ސަފީރު ވޭންގް ލިޒިން ކުރެއްވި ޓުވީޓެއްގައި ވިދާޅުވީ ރާއްޖެ އާއި ޗައިނާއާ ދެމެދު އޮންނަނީ ޒަމާންވީ ގާތް ގުޅުމެއް ކަމަށް ޝީ ވިދާޅުވެފައިވާ ކަމަށެވެ. 

އަދި އިހުލާސްތެރިކަމާ އެކު ދެ ގައުމުން އެއް ގައުމު އަނެއް ގައުމަށް އިތުބާރުކުރުމާއި އެހީތެރިކަން ފޯރުކޮށްދިނުމަށް އަދި ތަރައްގީގައި ބައިވެރިވުން އޮންނާނެ ކަމަށް، ޝީ ވިދާޅުވި ކަމަށް ސަފީރުގެ ޕޯސްޓުގައިވެ އެވެ.

"ރާއްޖެ އާއި ޗައިނާގެ ގުޅުން ބަދަހިކުރުމަށް އަޅުގަނޑު ވަރަށް އިސްކަންދެން. މިއޮތް ޒަމާންވީ ރަހުމަތްތެރިކަން ދެމެހެއްޓުމާއި ކުރިއަށް އޮތް ތަނުގައި ގުޅުން ބަދަހިކޮށް، އިތުރު ކުރިއެރުންތަކާއެކު އެއްބާރުލުން ދިނުމުގެ ގޮތުން، ތިޔަބޭފުޅުންނާ އެކު މަސައްކަތް ކުރަން އަޅުގަނޑު މި ހުރީ ތައްޔާރަށް." ޗައިނާ ރައީސްގެ މެސެޖު ފޯރުކޮށްދެއްވައި ސަފީރު ކުރެއްވި ޓުވީޓުގައި ވިދާޅުވި އެވެ. 

ސެޕްޓެމްބަރު 9 ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި އެންމެ ކުރި ހޯއްދެވި ދެ ކެންޑިޑޭޓުންނަކީ މުއިއްޒާއި ރައީސް އިބްރާހިމް މުހައްމަދު ސޯލިހެވެ. އެ ބުރުގައި މުއިއްޒު ވަނީ 101،635 ވޯޓު ހޯއްދަވައިފައެވެ. ފުރަތަމަ ބުރުގައި ރައީސް ސޯލިހަށް ހޯއްދެވުނީ 86،161 ވޯޓެވެ.

ނަމަވެސް އެއްވެސް ކެންޑިޑޭޓަކަށް %50 އަށް ވުރެ މަތިން ވޯޓު ލިބިވަޑައިގެންފައި ނުވާތީ އެއް ވަނަ އާއި ދެވަނަ އަށް ދިޔަ ކެންޑިޑޭޓުގެ ދެމެދުގައި ވަނީ ދެވަނަ ބުރެއް ބާއްވައިފައެވެ. ދެވަނަ ބުރުގައި މުއިއްޒު ވަނީ 129،159 ވޯޓް ހޯއްދަވައިފައެވެ. އަދި ރައީސް ސޯލިހަށް ލިބިވަޑައިގަތީ 109،868 ވޯޓެވެ.