އިންތިޚާބީ ރައީސް ޑރ. މުޙައްމަދު މުއިއްޒު ޗައިނާ ސަފީރު ވަންގް ލިޒިންއާ މިއަދު ބައްދަލުކުރައްވައިފިއެވެ.
މުއިއްޒުގެ ގެކޮޅު، މ. ދިމްޔާތުގައި މިއަދު މެންދުރު 14:00 ގައި ބޭއްވުނު މި ބައްދަލުވުމައި އިންތިޚާބީ ނާއިބު ރައީސް ހުސައިން މުހައްމަދު ލަތީފް ވެސް ވަނީ ބައިވެރިވެވަޑައިގެންފައެވެ.
މި ބައްދަލުވުމުގައި، އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ދައުރުގައި، ޗައިނާއާ އެކު އޮންނަ ގުޅުން މިހާރަށްވުރެ ހަރުދަނާކުރެވި، އާ ހަރުފަތަކަށް ގެންދެވުމަށް އުއްމީދުކުރައްވާކަމަށް ވިދާޅުވިއެވެ. އަދި ޗައިނާ ސަރުކާރުން ދިވެހިރާއްޖޭގެ ތަރައްޤީއަށް ވެދެއްވަމުންގެންދަވާ އެހީތެރިކަމަށް ޝުކުރުއަދާކުރައްވަވައި، ފެށިގެންދާ އާ ސަރުކާރުން ރައްޔިތުންނަށް ވެވަޑައިގެންފައިވާ ވަޢުދުތައް ފުރިހަމަކުރެއްވުމުގައި، ޗައިނާ ސަރުކާރުގެ އެހީތެރިކަމާއި ބައިވެރިވުމަށް އެދިވަޑައިގެންނެވިއެވެ.
ޗައިނާ ސަފީރުގެ ވާހަކަފުޅުގައި، ދިވެހިރާއްޖެ-ޗައިނާގެ ގުޅުން އިތުރަށް ހަރުދަނާކުރުމަށް ދެ ފަރާތުން ގުޅިގެން ކުރެވެންހުރި މަސައްކަތްތަކަށާއި ދިވެހިރާއްޖޭގެ ތަރައްޤީއަށް ބޭނުންވާ އެކި ދާއިރާތަކުން ފުރިހަމަ އެހީތެރިކަމާއި އެއްބާރުލުން ދެއްވާނެކަމުގެ ޔަގީންކަންދެއްވެވިއެވެ.
މިއީ އިންތިޚާބީ ރައީސްގެ ހައިސިއްޔަތުން މުއިއްޒު ބައްދަލުކުރެއްވި ދެވަނަ ޑިޕްލޮމެޓެވެ.
އެންމެ ފުރަތަމަ ބައްދަލުކުރެއްވީ ބްރިޓިޝް ހައި ކޮމިޝަނަރު ކެރޮން ރޮސްލާއާ އެވެ. އޭނާއާއި ބައްދަލު ކުރެއްވީ މިއަދު ހެނދުނުއެވެ.
ޗައިނާ ސަފީރާ ޑރ.މުޢިއްޒު ބައްދަލު ކުރައްވާފައިވާއިރު، މުޢިއްޒު ވެރިކަމަށް އިންތިޚާބުވެ ވަޑައިގެންނެވުމާއި އެކު ބޭރުގެ މީޑިއާ ތަކުން އެމަނިކުފާނު ސިފަ ކުރައްވާފައި ވަނީ "ޕްރޯ ޗައިނާ" ކެންޑިޑޭޓުގެ ގޮތުގައެވެ.
އެފަދައިން ބޭރުގެ މީޑިއާ ތަކުން ސިފަކޮށްފައި ވަނީ ޗައިނާގެ އެ މަނިކުފާނު ނިސްބަތްވާ ޕީޕީއެމް/ޕީއެންސީ ކޯލިޝަންގެ ލީޑަރު ރައީސް ޔާމީން އަބްދުލްގައްޔޫމް ވެރިކަން ކުރެއްވި ދުވަސްވަރު އެ މަނިކުފާނު ބޮޑަށް ބަރޯސާވެފައިވަނީ ޗައިނާއަށް ކަމަށްވާތީއެވެ. އެގޮތުން ޔާމީން ސަރުކާރުގައި ޗައިނާގެ އެހީތެރިކަމާއެކު މިހާތަނަށް ރާއްޖޭގައި ހިންގާފައި ނުވާ ތަރައްގީގެ ބޮޑެތި މަޝްރޫއުތައް ހިންގަވައިފައިވާއިރު އެ ބޮޑެތި މަޝްރޫއުތައް ހިންގެވި ވަޒީރެއްގެ ގޮތުގައި ހުންނެވީ މުއިއްޒެވެ.
Advertisement
This content is created and paid for by advertisers and does not involve Voice Journalists
