އިންތިޚާބީ އައު ސަރުކާރާއި އެކު ސަޢުދީޢަރަބިއްޔާ އާއި ރާއްޖޭގެ ގުޅުން އިތުރަށް ބަދަހި ވެގެން ދާނެ ކަމަށް އިންތިޚާބީ ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.

ޑރ މުޢިއްޒު މިހެން ވިދާޅުވީ އެމަނިކުފާނުގެ އަރިއަހަށް ރާއްޖެއަށް ސަޢުދީޢަރަބިއްޔާއިން ކަނޑައަޅުއްވައިފައި ހުންނަވާ ސަފީރު ކުރެއްވެވި އިޚްތިރަމްގެ ޒިޔާރަތުގައެވެ.

މިބައްދަލު ކުރެއްވުމުގައި އިންތިޚާބީ ރައީސް ޑރ މުޢިއްޒުގެ އިތުރުން އިންތިޚާބީ ނައިބު ރައީސް ހުސެއިން މުޙައްމަދު ލަތީފް ވެސް ވަނީ ބައިވެރިވެ ވަޑައިގެންފައިވެއެވެ.

Advertisement

މިބައްދަލުވުމުގައި ޑރ މުޢިއްޒު ދެއްކެވި ވާހަކަފުޅުގައި ވިދާޅުވީ ސަޢުދީޢަރަބިއްޔާއާ އެކު އޮންނަ ގުޅުން މިހާރަށްވުރެ ހަރުދަނާކުރެވި، އާ ހަރުފަތަކަށް ގެންދެވުމަށް އުއްމީދުކުރައްވާކަމަށެވެ.

މީގެ އިތުރުން ދިވެހިރާއްޖެއަކީ އިސްލާމީ ޤައުމެއްކަމުން ޢަރަބި އިސްލާމީ ޤައުމުތަކާ އޮންނަ ގުޅުން މިހާރަށްވުރެ ބަދަހިކުރުމަށް އެދިވަޑައިގަންނަވާކަމަށްވެސް ޑރ މުޢިއްޒު ވަނީ  ފާހަގަކުރައްވައިފައެވެ. އަދި ސަޢުދީޢަރަބިއްޔާގެ އެހީތެރިކަމާއެކު ދިވެހިރާއްޖޭގައި ކުރިޔަށްގެންގޮސްފައިވާ އަދި މިހާރުވެސް ކުރިޔަށްދާ މަޝްރޫޢުތަކަށް ޑރ މުޢިއްޒު ވަނީ ޝުކުރުއަދާކުރައްވައިފައެވެ.

ހަމަމިއާއިއެކު  އާ ސަރުކާރުން ރައްޔިތުންނަށް ވެވަޑައިގެންފައިވާ ވަޢުދުތައް ފުރިހަމަކުރެއްވުމުގައި، ސަޢުދީޢަރަބިއްޔާގެ އެހީތެރިކަމާއި ބައިވެރިވުމަށް އިންތިޚާބީ ރައީސް ޑރ މުޢިއްޒު ވަނީ އެދިވަޑައިގެންފައެވެ.

މިބައްދަލުވުމުގައި ސަޢުދީ ސަފީރު ވިދާޅުވީ ދިވެހިރާއްޖެއާ ސަޢުދީޢަރަބިއްޔާއަކީ އެއްގޮތަށް ވުރެ ގިނަ ގޮތުން ގުޅިފައިވާ ދެ ޤައުމުކަން ފާހަގަކުރެއްވިއެވެ. އަދި މިގުޅުންތައް އިތުރަށް ބަދަހި ކުރުމަށް ދެ ފަރާތުން ގުޅިގެން ކުރެވެންހުރި މަސައްކަތްތަކަށާއި، ދިވެހިރާއްޖޭގެ ތަރައްޤީއަށް ބޭނުންވާ އެކި ދާއިރާތަކުން ފުރިހަމަ އެހީތެރިކަމާއި އެއްބާރުލުން ދެއްވާނެކަމުގެ ޔަގީންކަން ސަޢުދީ ސަފީރު ދެއްވިއެވެ.