ރާއްޖޭގެ އެކި ސަރަހައްދުތަކުގައި ޤާއިމްވެ ތިބި އިންޑިއާ ސިފައިން އަނބުރާ ފޮނުވާލުމަށް އިންތިޚާބީ ރައީސް ޑރ މުހައްމަދު މުއިއްޒު ނިންމެވި ނިންމެވުމަށް އިންޑިއާގެ ސަފީރު އިޚްތިރާމުކުރައްވާކަމަށް ވިދާޅުވެފައިވާކަން އިންތިޤާލީ ތަރުޖަމާނު މުޙައްމަދު ފިރުޒުލް ވިދާޅުވެއްޖެ އެވެ. 

ފިރުޒުލް މިފަދައިން ވިދާޅުވެފައި ވަނީ ސަރުކާރު ބަދަލުވުމުގެ އިންތިޤާލީ މަރުހަލާ ކުރިއަށްދާ ގޮތާއި ގުޅޭގޮތުން ނޫސްވެރިންނަށް މައުލޫމާތު ދިނުމަށް ބޭއްވި ޕްރެސް ކޮންފްރެންސްގައި ވާހަކަދައްކަވަމުންނެވެ. 

ފިރުޒުލް ވިދާޅުވީ ދިވެހިރާއްޖޭގެ އެކި ކަންކޮޅުތަކުގައި އިންޑިއާ ސިފައިން ތިބެން ރައްޔިތުން ބޭނުންނުވާކަމަށް އިންތިޚާބީ ރައީސް ޑރ މުއިއްޒު އިންޑިއާގެ ސަފީރުގެ އަރިހުގައި ދަންނަވާފައިވާ ކަމަށެވެ. އަދި އިންޑިއާ ސިފައިން އަނބުރާ ފޮނުވާލަން އެމަނިކުފާނު ނިންމަވާފައިވާކަން ވެސް ހާމަކުރައްވާފައިވާ ކަމަށެވެ. 

އެއާއެކު އިންޑިއާ ސަފީރުވެސް އެ ނިންމެވުމަށް އިޚްތިރާމު ކުރައްވާކަން ހާމަކުރައްވާފައިވާ ކަމަށާއި، އަދި ދިވެހިރާއްޖޭގެ މިނިވަންކަމާއި ސިޔާދަތަށް އިޚްތިރާމުކުރާނެކަން ހާމަކުރައްވާފައިވާކަމަށް ފިރުޒުލް ވިދާޅުވި އެވެ. 

ފިރުޒުލް އިތުރަށް ވިދާޅުވީ ރައީސް އިބްރާހިމް މުހައްމަދު ޞާލިހުގެ ސަރުކާރުން އިންޑިއާއިން ނަގާފައިވާ ލޯނުތައް އަނބުރާ ދެއްކުމުގައި ވެސް ލުއި ގޮތްތަކެއް ހަމަޖެއްސުމާއި ގުޅޭގޮތުން އިންތިޚާބީ ރައީސްއާއި ސަފީރާއި ވާހަކަތައް ދެކެވިފައިވާ ކަމަށެވެ. އަދި އެކަމުގައި ވެސް އިންޑިއާގެ އެއްބާރުލުން ދެއްވާނެކަމަށް ސަފީރު ވިދާޅުވެފައިވާ ކަމަށެވެ. 

ޑރ މުއިއްޒު ވިދާޅުވެފައިވަނީ ރާއްޖޭގެ މިނިވަންކަމާއި އިސްތިގުލާލަށް ފުރިހަމައަށް އިޚްތިރާމުކުރާ ހުރިހާ ގައުމުތަކާއެކު ވެސް ހަމަހަމަ ޚާރިޖީ ގުޅުންތައް ބާއްވާނެ ކަމަށެވެ. އަދި ދޭދޭ ގައުމުތަކާއި ގުޅުން ބޭއްވުމުގައި ތަފާތުކުރުންތައް ނުގެންގުޅުއްވާނެ ކަމަށެވެ. 

އެމަނިކުފާނު ވަނީ މިހާތަނަށް ނުވަ ގައުމެއްގެ ސަފީރުންނާއި ބައްދަލުކުރައްވާ ދެ ގައުމުގެ ގުޅުންތައް އިތުރަށް ހަރުދަނާކުރާނެ ގޮތްތަކާއި ގުޅޭގޮތުން މަޝްވަރާކުރައްވާފަ އެވެ.