މިއަދަށް އެޖެންޑާކުރި ރައްޔިތުންގެ މަޖިލީހުގެ ޖަލްސާ ކޯރަމް ހަމަނުވެގެން ނިންމާލައިފި އެވެ.

މިއަދު ހެނދުނު 9:00 އިން ފެށިގެން މަޖިލީހުގެ ޖަލްސާގައި ކޯރަމް ހަމަވާ ވަރަށް މެންބަރުން ތަޅުމަށް ވަޑައި ގަންނަވާތީ  ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުالله ވަނީ މަޑު ކުރައްވާފައެވެ. ނަމަވެސް މަޑު ކުރަންޖެހޭ ވަގުތު ހަމަވިއިރު އިރުވެސް މެންބަރުން ހަމަ ނުވުމުން މިއަދުގެ ޖަލްސާ ނިންމަވާލައްވައި، ދެން ޖަލްސާއެއް ބާއްވާނެ ދުވަހެއް އަންގަވާނެ ކަމަށް އީވާ ވަނީ ވިދާޅުވެފަ އެވެ. 

މަޖިލީހުގައި ޖުމްލަ 87 މެންބަރުން ތިއްބަވާއިރު، ކޯރަމް ހަމަވާން ބޭނުންވަނީ 22 މެންބަރުންނެވެ. ނަމަވެސް ފަހަކަށް އައިސް އެ އަދަދަށް ވެސް މެންބަރުން ވަޑައިނުގަންނަވަ އެވެ.

ކޯރަމް ހަމަނުވެގެން މިއަދުގެ ޖަލްސާ ނިންމާލިއިރު، އެޖެންޑާގައި މުހިންމު މަސައްކަތްތަކެއް ހުރިކަން ފާހަގަކޮށްލެވެއެވެ.

އެގޮތުން ކުނި މެނޭޖުކުރުމުގެ ގާނޫނަށް އިސްލާހު ގެނައުމުގެ ބިލާއި، އިންޑަސްޓްރިއަލް ރިލޭޝަންއާއި ބެހޭ ބިލުގެ ބަހުސްއާއި، ފެނަކައިން ކުދި ވިޔަފާރިތަކާއި، ކުންފުނިތަކަށް ދޭންޖެހޭ ފައިސާ ދިނުން އަވަސްކުރުމަށާއި، ފެނަކައިގެ މެނޭޖްމަންޓް އަދި ފައިނޭންޝަލް އޮޑިޓެއް ހެދުމަށާއި، ދަރަނިތައް އަދާކުރާނެ ގޮތުގެ ޕްލޭނެއް އެކުލަވާލުމަށް ގޮވާލާ ހުށައަޅާފައިވާ ގަރާރުގެ ބަހުސްވެސް އެޖެންޑާ ކޮށްފައިވެއެވެ.

އަދި ހަމައެހެންމެ ރާއްޖޭގެ މަސްކަނޑުން ގެއްލުނު ބައި ހޯދުމުގެ މަސައްކަތް އަވަހަށް ފެށުމަށް ސަރުކާރަށް ގޮވާލާ ހުށައަޅާފައިވާ ގަރާރުގެ ބަހުސްއާއި، ދިވެހިރާއްޖޭގެ ޖުމްހުރިއްޔާގެ ގާނޫނު އަސާސީއަށް އިސްލާހު ގެނައުމުގެ ބިލުގެ ބަހުސްވެސް އެޖެންޑާ ކޮށްފައިވެއެވެ.

އޭގެ އިތުރުން ކޮމިޓީތަކުން ހުށައަޅާ ކަންކަމާއި، ދުވަހުގެ މަސައްކަތްތަކުގެ ތެރެއިން ވޯޓުން ނިންމާ ހިސާބަށް ގޮސްފައިވާ ކަންކަމަށް ވޯޓަށް އެހުން ހިމެނެއެވެ.