ރާއްޖެ އިން ޕާކިސްތާނަށް ކަނޑައަޅާ އާ ސަފީރަކަށް ޚަދީޖާ ނަޖީހާ އައްޔަނުކުރަން ރައްޔިތުންގެ މަޖިލީހުގެ ރުހުން ހޯދަން ސަރުކާރުން ހުށަހަޅައިފި އެވެ.

ނަޖީހާ ޕާކިސްތާނުގެ ސަފީރުކަމަށް އައްޔަން ކުރަން ރައީސް އިބްރާހިމް މުހައްމަދު ޞާލިހު މަޖިލީހަށް ފޮނުއްވި ސިޓީ މަޖިލީހުގެ މިއަދުގެ ޖަލްސާގައި އަމީން އާއްމު ވަނީ އިއްވަވާފައެވެ. އަދި އެ މައްސަލަ ވަނީ ހާރިޖީ ގުޅުންތަކުގެ ކޮމިޓީއަށް ފޮނުވާފައެވެ.

ޕާކިސްތާނުގެ ސަފީރަކު އައްޔަނު ކުރަން އިއްޔެ ރައީސުލްޖުމްހޫރިއްޔާގެ ސިޓީއެއް މަޖިލީހަށް ފޮނުވާފައިވާއިރު، އިއްޔެގެ މަޖިލީހުގައި ވެސް ވަނީ ބަންގްލަދޭޝް އާއި ޔޫއޭއީ އަށް އާ ސަފީރުން ކަނޑައަޅަން ރައްޔިތުންގެ މަޖިލިހުގެ ރުހުން ހޯދަން ސަރުކާރުން ހުށަހަޅައިފަ އެވެ. އެ ދެ މައްސަލަ ވެސް ޚާރިޖީ ގުޅުންތަކާބެހޭ ކޮމިޓީއަށް ފޮނުވައިފަ އެވެ.

އައު ސަފީރަކު އައްޔަނު ކުރަން ރައީސް ޞާލިހު ފޮނުއްވާފައި ވާއިރު، އައު މަގާމު ތަކަށް މީހުން ނުނެގުމަށް އެދި އިންތިޚާބީ ރައީސް ޑރ މުހައްމަދު މުއިއްޒު ވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ދާދިފަހުން ސިޓީއެއްވެސް ފޮނުއްވާފައެވެ. 

އަދި އިއްޔެ އައު ދެ ސަފީރުންނަށް ރުހުންދޭން މަޖިލީހަށް ހުށަހެޅުމުން އިންތިހާބީ ރައީސްގެ ތަރުޖަމާނުވެސް އެކަމާ ކަންބޮޑުވުން ފާޅުކުރައްވާފައެވެ.