ޕްރޮގްރެސިވް ކޮންގްރެސް ކޯލިޝަނުން އިންތިޚާބީ ރައީސް ޑރ މުހައްމަދު މުއިއްޒާއެކު ވެރިކަމަށް އަންނަނީ 10 އަހަރު ވެރިކަން ކުރުމަށް ކަމަށް ޑިރެކްޓާ ޖެނެރަލް އޮފް ޓްރާންސިޝަން އަބްދުއްރަހީމް އަބްދުالله ވިދާޅުވެއްޖެ އެވެ. 

އަބްދުއްރަހީމް މިފަދައިން ވިދާޅުވެފައި ވަނީ އިންތިޚާބީ ރައީސުލްޖުމްހޫރިއްޔާގެ އޮފީހުން އިއްޔެ ބޭއްވި ނޫސްވެރިންގެ ބައްދަލުމުގައި ވާހަކަދައްކަވަމުން ނެވެ. 

އެގޮތުން އަބްދުއްރަހީމް ވިދާޅުވީ ރިޔާސީ އިންތިޚާބުގައި ޑރ މުއިއްޒު ވެވަޑައިގެންނެވި ވައުދުތައް ފުއްދަވާދެއްވާނެ ކަމުގެ ފުރިހަމަ ޔަގީންކަން އޮތް ކަމަށެވެ. އަދި އެ ވައުދުތައް ފުއްދުމަށްޓަކައި އިންތިޤާލީ މަރުހަލާ ކުރިއަށްދާއިރު، ސަރުކާރުގެ ވުޒާރާތަކާއި ކުންފުނިތަކުގެ ހާލަތު ބެލުން ވަރަށް މުހިންމު ކަމަށާއި، އެކަމަށްޓަކައި ސަރުކާރުން ފުރިހަމަ އެއްބާރުލުން ވެސް ދޭން ޖެހޭކަމަށް އަބްދުއްރަހީމް ވިދާޅުވި އެވެ. 

އަބްދުއްރަހީމް ވިދާޅުވީ އިންތިގާލީ މަރުހަލާ ކުރިއަށްދާއިރު، ސިޔާސީ މަގާމުތަކުގައި ތިބި ފަރާތްތައް ސިވިލް ސާވިސްއަށް ބަދަލުކުރުމާއި، އިތުރު މުވައްޒަފުން ނެގުމާއި މަޝްރޫއުތައް ފެއްޓުމަކީ ޤާނޫނު އަސާސީގެ ރޫހާއިވެސް ޚިލާފުކަމެއް ކަމަށެވެ. އަދި އެކަމުގެ ސަބަބުން އާ ސަރުކާރަށް ގޮންޖެހުންތަކާއި ވެސް ކުރިމަތިލާން ޖެހޭނެ ކަމަށެވެ. 

ރައްޔިތުން ޑރ މުއިއްޒު އިންތިޚާބުކުރީ އެމަނިކުފާނުގެ ސިޔާސަތުތަކަށް ރައްޔިތުން ތާއީދުކުރާތީ ކަމަށާއި، އަދި އެ ސިޔާސަތުތައް ތަންފީޒުކުރާނެ ކަމުގެ ޔަގީންކަން އޮތުމުންކަން ފާހަގަކުރައްވާ އަބްދުއްރަހީމް ވިދާޅުވީ ޑރ މުއިއްޒު ކެމްޕޭނުގައި ވީ ވައުދުތައް ފުއްދަވާދެއްވާނެ ކަމަށެވެ. 

އަދި ހަމައެއާއެކު ދެވަނަ ދައުރަކަށް ޑރ މުއިއްޒު ރައްޔިތުންގެ ކުރިމއްޗަށް އަރާވަޑައިގަންނަވާނީ ވީ ވައުދުތައް ފުއްދަވާދެއްވުމަށްފަހު ރައްޔިތުން އިތުރަށް ބޭނުންވާ ކަންތައްތަކަކީ ކޮބައިތޯ ސާފުކޮށް އެކަންކަން ކޮށްދެއްވުމަށްކަމަށް އަބްދުއްރަހީމް ވިދާޅުވި އެވެ. އަދި ވިދާޅުވީ ވިސްނުންފުޅަކީ ޑރ މުއިއްޒާއެކު ވެރިކަމުގެ ދެ ދައުރު ފުރިހަމަކުރުން ކަމަށެވެ. 

އަބްދުއްރަހީމް އިތުރަށް ވިދާޅުވީ ޑރ މުއިއްޒުގެ ވެރިކަމުގައި މަޝްރޫއެއް ފައްޓަވައިފިނަމަ އެ މަޝްރޫއު ނުނިންމާ ދިގުދަންމަން ނުހުންނަވާނެ ކަމަށެވެ. އަދި ތަރައްގީގެ މަސައްކަތްތަކުގައި ނަތީޖާ ނެރެދެއްވާނެ ކަމަށެވެ. 

ރައްޔިތުންގެ އިތުބާރު އެމަނިކުފާނަށް އޮތްކަމަށާއި، މިއީ ޑިމޮކްރަސީގެ ރީތި އުސޫލުތަކުގެ ތެރެއިން އިންތިޤާލީ މަރުހަލާގައި އެއްބާރުލުން ދެއްވަންވީ ވަގުތުކަމަށް އަބްދުއްރަހީމް ވިދާޅުވި އެވެ.