ވައުދުތައް ފުއްދުމަށްޓަކައި ރައްޔިތުންގެ މަޖިލީހުގެ އަގުލަބިއްޔަތު ޕްރޮގްރެސިވް ކޮންގްރެސް ކޯލިޝަނަށް ލިބުމަކީ މުހިންމު ކަމެއް ކަމަށާއި، އަމާޒަކީ ރައްޔިތުންގެ މަޖިލީހުގެ ތިންބައިކުޅަ ދެބައި ޕީޕީއެމް-ޕީއެންސީއަށް ކާމިޔާބުކުރުން ކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.
ޑރ މުއިއްޒު މިފަދައިން ވިދާޅުވެފައި ވަނީ ސަންގު ޓީވީއަށް ދެއްވި އިންޓަވިއުއެއްގަ އެވެ.
އެމަނިކުފާނު ވިދާޅުވީ ރައްޔިތުންގެ ވިސްނުން ހުރީ ޕީޕީއެމް-ޕީއެންސީއާއެކު ކުރިއަށް ދާގޮތަށްކަން ރިޔާސީ އިންތިޚާބުގެ ނަތީޖާއިން ސާފުވެގެން ގޮސްފައިވާ ކަމަށެވެ. އަދި ރައްޔިތުންގެ ވިސްނުމަކީ ގައުމުގައި ހުރި ބޮޑެތި މައްސަލަތައް ހައްލުކުރުމަށް ޕީޕިއެމް-ޕީއެންސީއަށް ފުރުސަތު ދިނުމުގެ ވިސްނުންކަން ވެސް އިންތިޚާބީ ރައީސް ޑރ މުއިއްޒު ފާހަގަކުރެއްވި އެވެ.
އެއާއެކު އެމަނިކުފާނު ވިދާޅުވީ ރައްޔިތުންގެ މަޖިލީހުގެ މެޖޯރިޓީ ހޯދުމަށް ޕީޕީއެމް-ޕީއެންސީން މަސައްކަތްޕުޅު ކުރައްވަމުން ގެންދަވާނެ ކަމަށެވެ. އަދި ޓާގެޓަކީ މަޖިލީހުގެ ތިންބައިކުޅަ ދެބައި އަގުލަބިއްޔަތު ހޯދުންކަމަށް ޑރ މުއިއްޒު ވިދާޅުވި އެވެ.
"އަޅުގަނޑުގެ އަމާޒަކީ ވީހާ ވެސް ގިނަ މެމްބަރުން، އެންމެ ބޭނުންވަނީ 2/3 މެޖޯރިޓީއެއް ލިބޭވަރަށް މެމްބަރުން ހޮވުން. މާނައަކީ 60 އަށްވުރެ ގިނަ މެމްބަރުން ޕީޕީއެމް ޕީއެންސީގެ ފަރާތުން އަދި އަޅުގަނޑުމެންނާއި ގުޅިފައިވާ ފަރާތްތަކާއި އެކީގައި ކޯލިޝަނަށް އިރާދަކުރެއްވިއްޔާ ސުޕަމެޖޯރިޓީއޭ މި ކިޔާގޮތަށް ލިބޭވަރަށް އިރާދަކުރެއްވިއްޔާ މަސައްކަތްކުރުން"
އިންތިޚާބީ ރައީސް ޑރ މުއިއްޒު
އޭގެ އިތުރުން ޑރ މުއިއްޒު ވިދާޅުވީ ރައްޔިތުންގެ މަޖިލީހުގެ ދާއިރާތަކަށް ތައުލީމީ ޤާބިލު އަންހެނުން ނެރުމަށް ވަރަށް ބޮޑަށް ބާރުއަޅުއްވާނެ ކަމަށެވެ.
އަންހެނުން އިސް ސަފަށް ނެރެގެން މަސައްކަތް ކުރުމަކީ އެމަނިކުފާނު ގެންގުޅުއްވާ ވިސްނުންފުޅެއްކަމަށާއި، އެ ފުރުސަތު އަންހެނުންނަށް ފަހިކޮށްދިނުމަށް މަސައްކަތްޕުޅު ވެސް ކުރައްވާނެކަމަށް ޑރ މުއިއްޒު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
