އާރުޑީސީއާއި ހަވާލުކޮށްގެން ނުނިންމި އޮތް އަމީނީ މަގު ޒަމާނީ ފެންވަރަށް ތަރައްގީކުރުމުގެ މަޝްރޫއު ނިންމާ، މާލޭގެ ބޮޑެތި ހުރިހާ މަގެއްގައި ތާރުއަޅާ ތަރައްގީކުރުމުގެ މަސައްކަތް ކުރައްވާނެކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ. 

އަމީނީ މަގު ޒަމާނީ ފެންވަރަކަށް ތަރައްގީކުރުމުގެ މަޝްރޫއު އެންމެ ފުރަތަމަ ހަވާލުކުރެވިފައިވަނީ ސިޓީ ކައުންސިލަށެވެ. އެހެން ނަމަވެސް އެފަހުން އެ މަސައްކަތް ވަނީ ސިޓީ ކައުންސިލްއަތުން އަތުލުމަށްފަހު ތިން ގުނަ އަގުބޮޑުކޮށް އާރުޑީސީއާއި ހަވާލުކޮށްފައެވެ. 

އެ މަސައްކަތް ނިންމަން އޮތް ތާރީހަށް މަސައްކަތް ނިންމާލެވިފައި ނުވާއިރު، އެކަމުގެ ހުރި ކަންބޮޑުވުންތަކާއެކު ގިނަ ބައެއްގެ ފާޑުކިޔުންވެސް އަމީނީ މަގު މަޝްރޫއަށް އަމާޒުވެގެން ދިޔައެވެ. 

Advertisement

އެ ކަމާއި ގުޅޭގޮތުން ސަންގު ޓީވީގެ "23 ގެ ރައީސް" ޕްރޮގްރާމުގައި ކުރި ސުވާލަކަށް ޖަވާބުދެއްވަމުން ޑރ މުއިއްޒު ވިދާޅުވީ މި ސަރުކާރު ނިމޭއިރުވެސް އަމީނީ މަގުގެ މަސައްކަތް ނިންމާނުލެވޭނެކަމަށް މަޒާޖީގޮތަކަށް ކުރިން އެމަނިކުފާނު ވިދާޅުވި ވިދާޅުވުން ހަގީގަތަކަށް ވެފައިވާ ކަމަށެވެ. 

އެހެން ނަމަވެސް ވެރިކަމާއި ހަވާލުވެވަޑައިގަތުމާއެކު އެ މަޝްރޫއު ބާރު ސްޕީޑުގައި ނިންމަވާނެ ކަމަށާއި އޭގެ އިތުރުން މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއެއް ވެސް ކުރިއަށް ގެންދަވާނެކަމަށް ޑރ މުއިއްޒު ވިދާޅުވި އެވެ. 

ޑރ މުއިއްޒު ވިދާޅުވީ އެ މަޝްރޫއު ހިންގަވާނީ އަހަރުތަކަށް ބައްސަވައިގެން ކަމަށެވެ. އަދި އެ މަސައްކަތް ކުރައްވާނީ ލާމަރުކަޒީ ނިޒާމުގެ ތެރެއިން ކައުންސިލް މެދުވެރިކޮށްކަމަށް އިންތިޚާބީ ރައީސް ޑރ މުއިއްޒު ވަނީ ވިދާޅުވެފަ އެވެ.