ކިތަންމެ ވަރަކަށް ބޭނުންކުރިޔަސް ކަރަންޓް ބިލް ބޮޑުނުވާނެ ގޮތަށް ފްލެޓް ރޭޓެއް ކަނޑައެޅުމުން ގޭބިސީތަކުގެ މިހާރުގެ ކަރަންޓު ބިލުތަކުން 50-30 ޕަސެންޓް ކުޑަވާނެ ކަމަށް ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފު ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގެ ކެންޕެއިންގެ ތެރެއިން ކަރަންޓު ބިލު ބޮޑުވުމުގެ މައްސަލަ ހައްލު ކުރުމަށް ފުލެޓު ރޭޓް ތަކެއް ކަނޑައަޅުއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއުލާން ކުރެއްވުމާއި ގުޅިގެން އެކަމަށް އަލިއަޅުވާ ލައްވައި، ރާއްޖެޓީވީގެ “ފަލަ ސުރުހީ” ޕްރޮގްރާމުގައި ވާހަކަދައްކަވަމުން ޝަރީފު ވިދާޅުވީ، ކަރަންޓު ފްލެޓް ރޭޓް ކަނޑައެޅުމަކީ ވަރަށް، މުހިންމު ކަމެއް ކަމަށެވެ.
“ފްލެޓް ރޭޓެއް ކަނޑައެޅުމުން 1،000 ޔުނިޓް ބޭނުންކުރިޔަސް، 500 ޔުނިޓް ބޭނުންކުރިޔަސް އަދި ކަނޑައަޅާފައި އިންނަ ހަތް ބޭންޑު ދާނީ އެއް ބޭންޑަކަށް ކަނޑައެޅިގެން. އޭގެ ފަހުން 500 ޔުނިޓް ބޭނުންކުރާ މީހުންނަށްވެސް 1،100 ޔުނިޓް ބޭނުންކުރާ މީހުންނަށްވެސް އަދި އޭގެ މަތިން ބޭނުންކުރާ މީހުން ކަމުގައިވިޔަސް މީހުން ދިރިއުޅުމަށް ބޭނުންކުރާ މީޓަރެއް ކަމަށްވާނަމަ ފްލެޓް ރޭޓަކުން އަގު ކަނޑައެޅިގެންދާނީ،”
އަހުމަދު ޝަރީފު
ޝަރީފު އިތުރަށް ވިދާޅުވީ، މާލޭގެ ގޭބިސީތަކުގެ ތެރެއިން 28 ޕަސެންޓަކީ 600 ޔުނިޓަށްވުރެ އިތުރަށް ކަރަންޓު ބޭނުންކުރާ ގެތައް ކަމަށެވެ. އެ މީހުންނަށް ބިލު ކުރާނީ 4.25 ރުފިޔާގެ ރޭޓުން ކަމަށެވެ.
“ފްލެޓް ރޭޓެއް ކަނޑައެޅި އިރުގައި، މިސާލަކަށް އެއީ އެންމެ ފުރަތަމަ ބޭންޑުގައި ހިމެނޭ ރޭޓަށް ކަމަށް ކަނޑައެޅިއްޖެ ކަމަށްވާ ނަމަ، އެއީ ދޮޅު ރުފިޔާގެ ރޭޓު އެއީ ފްލެޓް ރޭޓުގެ ގޮތުގައި ކަނޑައެޅިއްޖެ ނަމަ، އެއީ ގާތްގަނޑަކަށް 31 ޕަސެންޓާއި 52 ޕަސެންޓާ ދޭތެރޭގެ އަދަދަކަށް ބިލް ކުޑަކުރެވިގެންދާނެ ކަމަށް އަންދާޒާތަކުން ދައްކާ،” ޝަރީފު ވިދާޅުވި އެވެ.
އޭނާ ވިދާޅުވީ، ޓެރިފް ރޭޓު ކަނޑައެޅޭނެ މިންވަރަކީ ކޮބައިތޯ މަޝްވަރާ ކުރަމުން އަންނަ ކަމަށާއި އެއާއެކު އެކަން ތަންފީޒު ކުރަން ފެށުމުން ސްޓެލްކޯގެ އާމްދަނީ ކުޑަވާނެ މިންވަރުގެ ދިރާސާއެއް ކުރަމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
