އިޒްރާއިލްގެ ފަތުރުވެރިންނަށް ރާއްޖެއައުން މަނާކުރުމަށް ގޮވާލާ ދިވެހިން ޝުއޫރުފާޅުކުރަން ފަށައިފި އެވެ.
ފަލަސްތީނުގެ މައުސޫމު ރައްޔިތުންނަށް އިޒްރާއިލްގެ ޔަހޫދީން ހުއްޓުމެއްނެތި ދެމުންގެންދާ ހަމަލާތަކުގައި އެތައް ހާސް ބަޔަކު ޝަހީދުކޮށްލާފައިވާއިރު، އިޒްރާއިލްގެ ޔަހޫދީން ރާއްޖެ އައިސް ރާއްޖޭގެ ހިތްގައިމު ގޮނޑުދޮށްތަކުގައި އުފާކުރުމުގެ ފުރުސަތު ނުދިނުމަށް ރައްޔިތުން ދަނީ ޝުއޫރުފާޅުކުރަމުން ނެވެ.
ލަވަކިޔުން ހުއްޓާލުމަށްފަހު ދީނީ ހޭލުންތެރިކަން އިތުރުކުރުމަށްޓަކައި މަސައްކަތް ކުރަމުންދާ އަލީ ރަމީޒު ފޭސްބުކުގައި ކުރެއްވި ޕޯސްޓެއްގައި ވަނީ އިޒްރޭލުގެ ފަތުރުވެރިން ރާއްޖެ އައުމާއި މެދު އާންމުންގެ ޚިޔާލަކީ ކޮބައިތޯ ސުވާލުކޮށްފައެވެ.
އެ ޕޯސްޓުކުރިތާ 24 ގަޑިއިރުތެރޭ ކޮމެންޓުކުރި އެއްހާހަށްވުރެ ގިނަ މީހުން ވަނީ އިޒްރާއިލުން ރާއްޖެއަށް މީހުން އައުން ހުއްޓުވަން ބޭނުންވާކަމަށް ބުނެފައެވެ. އަދި އިޒްރާއިލްގެ ޔަހޫދީންނަށް ރާއްޖޭގެ ހިތްފަސޭހަކަމުން ހިތްހަމަޖެހުން ހޯދުމުގެ ފުރުސަތު ދިނުން ހުއްޓުވަން ޖެހޭކަމަށް ބުނެފައެވެ.
"އިޒްރާއިލު މީހުން ރާއްޖެ އައުން މިހާރުން މިހާރަށް މަނާކުރަން ޖެހޭ"
"ފަތުރުވެރިން އެކަންޏެއް ނޫން، އެއްވެސް ކަމެއްގައި، އެމީހުން އެއްވެސް ކަމެއް ކުރުމަށް މި ގައުމަށް އައުމަށް ނުރުހެވޭނެ. މި ނިންމުމަކީ މިހާރުން މިހާރަށް ސަރުކާރުން ނިންމަން ޖެހޭ ނިންމުމެއް. އެ ސުންޕާ ޒައިނިސްޓުންގެ ކިބައިން ފަލަސްތީނު ސަލާމަތްކުރައްވާށި.. އާމީން"
ސައީދު މުހައްމަދުގެ ނަމުގައި ކޮށްފައިވާ ކޮމެންޓެއް
"ފަލަސްތީނު ރައްޔިތުންގެ ލޭ ބޮއިގެން ޗުއްޓިހަދަން އަންނަ މަންޒިލަކަށް މި ގައުމު ވެގެން ނުވާނެ. އެމީހުންނަށް އެ ފުރުސަތު ދިނުމަކީ އެމީހުންނާއި އެއްބައިވުންކަމަށް ބެލެވޭނީ. ވަގުތުން ވަގުތަށް އެމީހުންނަށް މި ގައުމަށް ނޭރޭގޮތަށް ނިންމަންވީ"
މުޖާ މަންސޫރުގެ ނަމުގައި ކޮށްފައިވާ ކޮމެންޓެއް
އެ ޕޯސްޓަށް ކޮމެންޓުކުރި ބައެއް ފަރާތްތަކުން ބުނީ ފަލަސްތީނަށް ދެމުންދާ ހަމަލާތައް ހުއްޓާލަންދެން އިޒްރާއިލްގެ އިތުރުން އެ ޔަހޫދީ ހަނގުރާމަވެރިންނަށް އެހީތެރިވާ ގައުމުތަކަށް ވެސް ރާއްޖެ ނާދެވޭނެ ގޮތަށް ފިޔަވަޅުތައް އެޅުން މުހިންމު ކަމަށެވެ. އަދި އިޒްރާއިލްގެ އުފެއްދުންތައް ވެސް ރާއްޖެ އެތެރެކުރުން ހުއްޓާލުމަށް ބައެއް ފަރާތްތަކުން ވަނީ ގޮވާލާފަ އެވެ.
ފަލަސްތީނާއި އެކު ދިވެހިން ތިބިކަން ދެއްކުމަށް ބޭއްވި ހަރަކާތުގެ ތެރެއިން-- ފޮޓޯ/ވޮއިސް
"އިޒްރާއިލް އަދި އިޒްރޭލަށް ތާއީދުކުރާ ބަޔަކުވެސް ރާއްޖޭގެ ބިމުގައި ފައިޖައްސަން ނޭދެން. އެފަދަ ބަޔަކު އުފައްދާ ޕްރޮޑަކްޓެއް ވެސް ރާއްޖެ އެތެރެކުރުމާ ދެކޮޅު"
އަލީ ރަޝްފާނުގެ ނަމުގައި ކޮށްފައިވާ ކޮމެންޓެއް
އިޒްރާއިލްގެ ފަތުރުވެރިން ރާއްޖެއައުން މަނާކުރުމަށް ގޮވާލާ ޝުއޫރުފާޅުކުރި ބައެއް ފަރާތްތަކުން ބުނީ، އިޒްރާއިލުން ރާއްޖެ އައުމާއި ރައްޔިތުން ދެކޮޅު ނަމަވެސް ސަރުކާރުން އެކަން ހުއްޓުވުމަށް މަސައްކަތް ކުރަމުން ނުދާކަމަށެވެ. އަދި އެއީ ވަރަށް ބޮޑު ކަންބޮޑުވުމެއްކަމަށް އެ ފަރާތްތަކުން ވަނީ ބުނެފައެވެ.
"އަހަރުމެން ކިތަންމެ ދެކޮޅުހެދިޔަސް އަންނާނެ. ޤައުމުގެ ވެރިން ތިބީ ޑޮލަރާއި ހެދި މޮޔަވެފައި"
ނޫމާ އިބްރާހިމްގެ ނަމުގައި ކޮށްފައިވާ ކޮމެންޓެއް
"އިޒްރާއިލްގެ ފަތުރުވެރިން އައުމާއި މެދު ސަރުކާރުން ފިޔަވަޅު ނާޅަންޏާ ދިވެހި ރައްޔިތުން ނިކުމެ ފިޔަވަޅު އަޅަން ވެއްޖެ"
ޖައުދާންގެ ނަމުގައި ކޮށްފައިވާ ކޮމެންޓެއް
އިޒްރާއިލުގެ ޓުއަރިސްޓުން ރާއްޖެ އެތެރެވުން މަނާކުރުމަށް ގޮވާލާ ދިވެހީން ޝުއޫރުފާޅުކުރަމުންދާއިރު، މި ކަމާއި ގުޅޭގޮތުން އަދި މިހާތަނަށް ސަރުކާރުން ވަކިއެއްޗެއް އަންގާފައެއް ނުވެއެވެ. އެހެން ނަމަވެސް ސަރުކާރުން ވެސް ވަނީ ފަލަސްތީނަށް އިޒްރާއިލުން ފަލަސްތީނަށް ދެމުންދާ ހަމަލާތަށް ކުށްވެރިކޮށްފަ އެވެ.
ދިވެހިން ފަލަސްތީނާއެކު ސައިކަލުބުރުގެ ތެރެއިން--ފޮޓޯ/ވޮއިސް
އިޒްރާއިލުގެ ޕާސްޕޯޓުގައި ރާއްޖެ ނުވަދެވޭގޮތް ހެދުމަށް ގޮވަލާ މަޖިލީހަށް ވަނީ ގަރާރެއް ހުށައަޅާފައެވެ. އަދި އެ މައްސަލައިގައި މަޖިލީހުގައި ފުޅާކޮށް ބަހުސްކުރުމަށް ވެސް ގަރާރުގައި ގޮވާލާފައި ވެއެވެ.
ފަލަސްތީނުގެ ރައްޔިތުންނާއެކު ދިވެހިން ތިބިކަން ހާމަކުރުމަށް ރާއްޖޭގެ އެކި ކަންކޮޅުތަކުގައި ދަނީ ބޮޑެތި ހަރަކާތްތަކެއް ހިންގަމުންނެވެ. އެގޮތުން ފަންޑު ރައީސިން އިވެންޓުތަކާއި އަޑުއުފުލުމުގެ ހަރަކާތްތައް ރާއްޖޭގެ އެކި ކަންކޮޅުތަކުގައި ދަނީ ހިންގަމުންނެވެ.
Advertisement
This content is created and paid for by advertisers and does not involve Voice Journalists
