'ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނުގައި ހިމެނޭ، އާންމު ތަންތަނުގައި އެއްވެ އުޅުން މަނާކުރާ މާއްދާ އުވާލަން، ރައްޔިތުންގެ މަޖިލީހަށް 2019 ވަނަ އަހަރު ހުށަހެޅި ބިލުގެ މަސައްކަތް، ސަލާމަތީ ހިދުމަތްތަކާ ބެހޭ ކޮމިޓީން ފަށައިފި އެވެ.

ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި 17 އޮގަސްޓު 2016 ގައި 'ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނަށް ގެނެވުނު އެ ބަދަލު ތަސްދީގު ކުރައްވާފައި ވަނީ، 23 އޮގަސްޓް 2016ގައެވެ. އެއާއެކު ހުއްދައަކާ ނުލައި އެއްވެވޭ ތަނެއްގެ ގޮތުގައި ކަނޑައަޅާފައިވަނީ ހަމައެކަނި ކާނިވާ ސަރަހައްދެވެ.

އެހެންނަމަވެސް، އެ މާއްދާގެ ސަބަބުން އެއްވެ އުޅުމުގެ މިނިވަންކަން ވަރަށް ބޮޑަށް ހަނިވެގެންދާ ކަމަށް ބުނެ އެ އިސްލާހު އުވާލަން އެދި، ކާށިދޫ ދާއިރާގެ މެމްބަރު އަބްދުالله ޖާބިރު، 2019 ވަނަ އަހަރު ރައްޔިތުންގެ މަޖިލީހަށް ހުށަހަޅާފައިވާއިރު އެ ބިލު ސަލާމަތީ ކޮމިޓީއަށްވެސް ހަމަ އެ އަހަރުގައި ހުށަހެޅުނެވެ. އެފަހުން 2020 ވަނަ އަހަރު، އެ ކޮމިޓީން ބިލު ދިރާސާކޮށް ނިންމިގޮތުގެ ރިޕޯޓު ފާސްކޮށް މަޖިލީހަށް ފޮނުވުމުން އަލުން އަނެއްކާވެސް އެ ބިލު ވަނީ ކޮމިޓިއަށް ފޮނުވާލާފައެވެ. 

Advertisement

އެފަދަ ގޮތަކަށް ހަތަރު އަހަރު ވަންދެން ބިލުގެ މަސައްކަތް ކުރިއަށް ނުގޮސް އޮތުމަށްފަހު، މިއަދު ވަނީ ބިލުގެ މަސައްކަތް ފަށާފައެވެ. އެގޮތުން މިއަދު އޮތް ކޮމިޓީގެ ބައްދަލުވުމުގައި ހޯރަފުށީ ދާއިރާގެ މެންބަރު އަހްމަދު ސަލީމް ވަނީ މިމަހުގެ ނިޔަލަށް ބިލުގެ މަސައްކަތް ނިންމުމަށް ހުށަހަޅުއްވައިފަ އެވެ. އަދި ކޮމިޓީގެ އަގުލަބިއްޔަތުން އެގޮތަށް ވަނީ ފާސް ވެސްފަ އެވެ.