މާލޭގެ ޢާއިލާއެއްގެ ފަރާތުން ފަލަސްޠީނަށް އެހީވުމަށް ހުޅުވާލާފައިވާ ފަންޑަށް ބައި ލައްކައަށްވުރެ ގިނަ ރުފިޔާ ހަދިޔާ ކޮށްފިއެވެ. 

މިމަހު 7 ވަނަ ދުވަހު، ފަލަސްޠީނުގެ މިނިވަންކަމަށްޓަމައި ޖިހާދުކުރަމުންދާ ހަމާސް ޖަމާއަތުން އެގައުމަށް ގަދަކަމުން ވެރިވެގެންފައިވާ އިސްރާއިލަށް އަމާޒުކޮށް ދިން ކުއްލި ހަމަލާއާއި ގުޅިގެން އިސްރާއީލުން ވަނީ ފަލަސްތީނާ ދެކޮޅަށް ހަނގުރާމަ އިއުލާންކޮށްފައެވެ. އެއާއެކު, އެމީހުންގެ ވަރުގަދަ ހަމަލާތައް ކެނޑިނޭޅި ފަލަސްޠީނުގެ ކުޑަކުދިންނާއި އަންހެނުން ހިމެނޭހެން އާއްމުންނަށް އަމާޒުކުރަމުންދާއިރު, ހަނގުރާމައިގެ ސަބަބުން އެތައް ހާސް މުސްލިމުން ވަނީ އަސާސީ ހައްގުތަކުން މަހްރޫމްވެ ބިކަ ހާލުގައި ޖެހިފަ އެވެ.

އެއާކޫލް ފެމިލީގެ ފަރާތުން ކުރިއަށް ގެންދިޔަ ފަންޑު ރެއިޒިން އިވެންޓްގެ ތެރެއިން--ފޮޓޯ/އެއާކޫލް ފެމިލީ

އެ ރައްޔިތުންނަަށް އެހީވުމަށް އިންޓަނޭޝަނަލް އެއިޑް ކެންޕެއިން (އައިއޭސީން) ހުޅުވާލާފައިވާ ފަންޑް ރެއިޒިން އިވެންޓަށް ފައިސާ ހަދިޔާ ކުރުމަށް "އެއާ ކޫލް" އާއިލާގެ ފަރާތުން މިދިޔަ ހުކުރު ދުވަހު އެގޭގެ ކުރިމަތީގައި ފަންޑް ރެޒިން އިވެންޓެއް ވަނީ ކުރިއަށް ގެންގޮސްފައިވެއެވެ.

މި ފަންޑް ރެއިޒިން އިވެންޓުގައި އެކި ބާވަތްތަކުގެ ކާނާ އެ އާއިލާ ފަރާތްތަކުން ކައްކައިގެން ވިއްކާފައިވާއިރު، އާއިލާގެ ކުޑަ ކުދިންވެސް ވަނީ އެކުދިންގެ ކުޅޭ ސާމާނުވެސް ވިއްކާފައެވެ.  އެގޮތުން އެތަނުން އެއްކުއްޖެއްގެ ޕީއެސް ފިޔަވައި ދެން ހުރި ހުރިހާ ކުޅޭ އެއްޗެއް ވިއްކާލާފައިވާކަމަށް އެ އާއިލާއިން "ވޮއިސް" އަށް ވަނީ މައުލޫމާތު ދީފައެވެ. 

އެއާކޫލް އާއިލާގެ ކުއްޖެއް. އެ ކުއްޖާގެ ޕީއެސް ފިޔަވައި ހުރިހާ ކުޅޭ ސާމާނު ވަނީ މި ފަންޑް ރެއިޒިން އިވެންޓުގައި ވިއްކާލާފައި

އަދި މީގެ އިތުރުން، ފަންޑަށް ފައިސާ ހޯދުމަށް ފަލަސްތީނުގެ ދިދަވެސް ފަހައިގެން ވިއްކާފައިވާއިރު، އެ ހުރިހާ ކަމަކުން، 51,245.00 ރުފިޔާ ވަނީ ލިބިފައެވެ. އެ ފައިސާ، އާއިލާއިން މިހާރު ވަނީ އައިއޭސީއަށް ހަވާލު ކޮށްފައެވެ. 

އެއާކޫލް ފެމިލީގެ ފަރާތުން ކުރިއަށް ގެންދިޔަ ފަންޑު ރެއިޒިން އިވެންޓްގެ ތެރެއިން--ފޮޓޯ/އެއާކޫލް ފެމިލީ

އެއާކޫލް އާއިލާގެ ފަރާތުން އައިއޭސީ ފަންޑަށް ފައިސާ ހަވާލު ކުރަނީ

އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ އިސްރާޢީލުގެ ޖައްބާރު އަސްކަރިއްޔާއިން ދަނީ ޣައްޒާއަށް މެދުކެނޑުމެއް ނެތި ބޮން އަޅަމުންނެވެ. މި ޙަމަލާތަކުގައި 4300 އަށްވުރެ ގިނަ ފަލަސްތިނުގެ ރައްޔިތުން މިހާތަނަށް ޝަހީދުކޮށްލާފައިވެއެވެ.