ފަލަސްޠީނުގެ ރައްޔިތުންނާ ދެކޮޅަށް އިޒްރޭލުގެ ޔަހޫދީން ހިންގަމުންދާ ޖަރީމާތަކާއި ގުޅިގެން ހާލުގައި ޖެހިފައިވާ ރައްޔިތުންނަށް އެހީވުމަށް "ޕެޓިސަރީ ބައި ޝިނާ" އިން  ޑޯނަޓް ވިއްކުމަށް ނިންމައިފިއެވެ.

ޕެޓިސަރީ ބައި ޝިނާގެ ނަމުގައި އިސްޓަގްރާމްގައި ހިންގަމުންދާ ޕޭޖުން ކޮށްފައިވާ ޕޯސްޓެއްގައި ބުނެފައިވާ ގޮތުން، ޑޯނަޓް ވިއްކައިގެން ފަންޑް ރެއިޒް ކުރުމުގެ ހަރަކާތް ބޭއްވުމަށް ހަމަޖެހިފައިވަނީ މިމަހު 24 ވަނަ ދުވަހުއެވެ. އަދި އެ ދެދުވަހު 9 ޑޯނަޓް ހިމެނޭ މިކްސްޑް ޑޯނަޓް ފޮށި ވިއްކުމަށް ހަމަޖެހިފައިވާއިރު އެއިން ކޮންމެ ފޮށްޓެއް ވިއްކުމަށް ހަމަޖެހިފައިވަނީ 85ރ އަށް ކަމަށް ބުނެފައިވެއެވެ.

ޑޯނަޓް ގެ އިތުރުން މި ފަންޑް ރެއިޒިން ހަރަކާތުގެ ތެރެއިން ބްރައުނީސް އާއި ކަޕް ކޭކު ވެސް ވަގުތުން ގަންނަ ލިބެން ހުންނާނެ ކަމަށް އެ ޕޭޖުން މައުލޫމާތު ދެއެވެ. އަދި އެ ހުރިހާ ތަކެއްޗެއް ވިއްކާނީ 143,ޗަނބޭލީ މަގު، އޯޓަމް ސެންޓަރ ކައިރީގައި ކަމަށްވެސް ބުނެފައިވެއެވެ.

Advertisement

މި ތަކެތި ވިއްކައިގެން ލިބޭ ހުރިހާ ފައިސާއެއްވެސް އިންޓަނޭޝަނަލް އެއިޑް ކެންޕެއިން (އައިއޭސީ)އިން ފަލަސްތީނަށް އެހީވުމަށް ހުޅުވާލާފައިވާ ފަންޑަށް ޖަމާ ކުރަން ނިންމާފައިވާ ކަމަށާ، ޑޯނަޓް ގަންނަން ބޭނުންވާ ފަރާތްތަކަށް މިރެއިން ފެށިގެން ޕްރީ އޯޑަރ ކުރެވޭނެ ކަމަށް އެ ޕޭޖުން މައުލޫމާތު ދެއެވެ.

މި މަހުގެ ހަތް ވަނަ ދުވަހުން ފެށިގެން ޣައްޒާގެ ހަމާސް އާއި އިސްރާއީލްގެ ހައްދުފަހަނައަޅާފައިވާ ޔަހޫދީންނާއި ދެމެދު ކުރެވެމުންދާ ހަނގުރާމައިގައި ޔަހޫދީން ހަމައެއް ލަމައެއް ނެތި  ޣައްޒާގެ އެކި ތަންތަނަށް ބޮން އަޅައި ސުންނާފަތި ކުރަމުންނެވެ.

ޣައްޒާގެ ސިއްހަތާ ބެހޭ ވުޒާރާއިން އިއްޔެ ބުނީ ޔަހޫދީންގެ ހަމަލާތަކުގައި ޝަހީދުވި މީހުންގެ އަދަދު 4،385 އަށް އަރާފައިވާ ކަމަށެވެ. އޭގެ ތެރޭގައި 1،756 ކުޑަކުދިންނާއި 976 އަންހެނުން ހިމެނޭ ކަމަަށްވެސް ބުނެފައިވެއެވެ.