އިންތިޚާބުތަކަށް ސަރުކާރުން ނުފޫޒު ފޯރުވުން ހުއްޓުވޭނީ ޤާނޫނެއް ހަދައި އެ ޤާނޫނު ފުރިހަމަޔަށް ތަންފީޒުކުރެވިގެން ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު އާދަމް ޝަރީފް އުމަރު ވިދާޅުވެއްޖެ އެވެ. 

އާދަމް ޝަރީފް މިފަދައިން ވިދާޅުވެފައިވަނީ އިންތިޚާބަށް ސަރުކާރުން ނުފޫޒު ފޯރުވުން ހުއްޓުވުމަށް ގޮވާލާ ހުށައަޅާފައިވާ ގަރާރަށް ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ. 

އާދަމް ޝަރީފް ވިދާޅުވީ މި ސަރުކާރުން ކޮންމެ އިންތިޚާބަކާއި ދިމާކޮށް، ނުފޫޒު ފޯރުވުމަށްޓަކައި ވަރަށް ގިނަ ކަންތައްތަކެއް ކޮށްފައިވާ ކަމަށެވެ. އަދި އެއީ ރައްޔިތުންގެ ވަރަށް ބޮޑު ކަންބޮޑުވުމެއް އޮތް މައްސަލައެއް ކަމަށެވެ. 

ސަރުކާރު ބަދަލުވި ނަމަވެސް އެ މައްސަލަ ހަމަ އެގޮތުގައި އޮތްކަމަށް އާދަމް ޝަރީފު ވިދާޅުވި އެވެ. އޭނާ ވިދާޅުވީ އާ ސަރުކާރެއް ރައްޔިތުން އެކުލަވާލަނީ ކުރީ ސަރުކާރުން ގޯސްކޮށް ކޮށްފައިވާ ކަންކަން ރަނގަޅުކުރުމަށް ކަމަށެވެ.

އެހެންކަމުން އިންތިޚާބަށް ސަރުކާރުގެ ނުފޫޒު ނުފޯރުވޭގޮތަށް ގާނޫނުތައް އެކުލަވާލަން ޖެހޭ ކަމަށާއި، ގާނޫނުތައް އެގޮތަށް ފަރުމާކުރެވިގެން ނޫނީ އެ މައްސަލައަށް ދާއިމީ ޙައްލެއް ލިބިގެންދާތަން ނުފެންނަކަމަށް އާދަމް ޝަރީފް ވިދާޅުވި އެވެ. 

އާދަމް ޝަރީފު ވިދާޅުވީ އިންތިޚާބަށް ނުފޫޒު ނުފޯރުވޭނެ ގޮތަށް ގާނޫނުތައް ފަރުމާކުރަން ޖެހެނީ ސަރުކާރުގެ އިޚްތިޔާރަށް ދޫކޮށްލައިފި ނަމަ، އަނެއްކާވެސް އިންތިޚާބުތަކަށް ސަރުކާރުން ނުފޫޒު ފޯރުވުމުގެ ފުރުސަތު އޮންނާނެތީކަމަށް އާދަމް ޝަރީފް ވިދާޅުވި އެވެ. 

އޭނާ ވިދާޅުވީ ގިނަ ފަހަރަށް ސިޔާސީ ފަރާތްތަކަށް ބާރު ލިބުމުން ރަނގަޅު ގޮތްތައް ދޫކޮށްލެވޭތަން ފެނިގެންދާ ކަމަށާއި، އެހެން ނަމަވެސް ގާނޫނުތައް ހަދާ ތަންފީޒު ކުރެވޭނަމަ ޖަވާބުދާރީ ކުރެވޭނެ ނިޒާމެއް އެކުލަވާލެވި ގޯސްކޮށް ކަންކަން ގެންދިއުމުގެ މަގު ބަންދުކުރެވިގެންދާނެކަމަށެވެ.