ދިވެހިރާއްޖޭގެ ރިސޯޓެއްގައި މަސައްކަތް ކުރާ އިސްރާއީލްގެ އަންހެނަކު، އެމީހުންގެ ދިދަ، ދިވެހި ގޮނޑުދޮށުގައި ބަހައްޓައި އިސްރާއީލްގެ ދިފާއުގައި ނުކުމެއްޖެއެވެ. 

"ކްލަބް މެޑް ކަނި" ރިސޯޓުގައި މަސައްކަތް ކުރާ، 'ނޯފިޓް ގޮލާނީ" ނަމަކަށް ކިޔާ އެ އަންހެން މީހާ, އިސްރާއީލްގެ ދިދަ އެ ރިސޯޓުގެ އަތިރިމަތީގައި ބެހެއްޓުމަށްފަހު ނަގާފައިވާ ފޮޓޯ އަކާއެކު، ފޭސްބުކުގައި ކޮށްފައިވާ ޕޯސްޓެއްގައި ބުނެފައިވާ ގޮތުން އޭނާ އާއި، އޭނާއާ އެކު އެ ރިސޯޓުގައި މަސައްކަތް ކުރާ އެހެން އިސްރާއީލްގެ މީހުންވެސް މިވަގުތު ރާއްޖޭގައި ހުރި ތާށިވެފައެވެ. 

އަދި ދިވެހިރާއްޖެ ފަލަސްޠީނުގެ ހައްގުގައި ތެދުވެ އިސްރާއީލް އާ ދެކޮޅަށް އަޑު އުފުލި ނަމަވެސް، ފަލަސްތީނާާއި, އެގައުމަށް ގަދަކަމުން ވެރިވެގެން ތިބި އިސްރާއީލްގެ ޔަހޫދީންނާ ދެމެދު ކުރެވެމުންދާ އެ ހަނގުރާމާގައި ކާމިޔާބީ ލިބޭނީ އިސްރާއީލް އަށް ކަމަށް އޭނާ ބުނެފައިވެއެވެ. އޭނާ ބުނެފައިވާ އެމީހުންނަކީ އަބަދުވެސް ކާމިޔާބީ ލިބިފައިވާ ބައެއް ކަމަށާ، އެކަމުގައި އެއީ "ޗެންޕިއަނުން" ނެވެ. 

Advertisement

މީގެ އިތުރުން، ދިވެހިރާއްޖެ އިސްރާއީލް އާ ދެކޮޅަށް ތެދުވެ، އެ ގައުމުގެ ރައްޔިތުން ރާއްޖެއިން ބޭރުކޮށް، އިސްރާއީލްގެ ފަތުރުވެރިންނަށްވެސް ރާއްޖެ ނާދެވޭގޮތް ހެދުމަށް ގޮވަމުން އަންނަ އިރު، އެކަމާއި ގުޅިގެން އޭނާ އާއި އޭ ރިސޯޓްގައި މަސައްކަތް ކުރާ މީހުންނަށް ނަފްސާނީގޮތުންވެސް އަސަރު ކުރި ކަމަށާ، އެހެން ނަމަވެސް ދެން އޭނާ ބުނަން ބޭނުން ވާހަކަ ބުނާނެ ކަމަށް ބުނެފައިވެއެވެ. 

މި އަންހެން މީހާގެ އެ ފޭސްބުކް ޕޯސްޓާއި ގުޅިގެން އިސްރާއީލް އަށް ބަދު ބަސް ބުނެ އޭނާއަށް މެސެޖު ކުރި ދިވެހި މުވައްޒަފެއް, ވަޒީފާއިން ވަކި ކޮށްފައިވާ ކަމަށް "ވޮއިސް" އަށް ވަނީ މައުލޫމާތު ލިބިފައެވެ.

އަދި މިހާރު އެ އިސްރާއީލްގެ އަންހެން މީހާވެސް ރާއްޖެއިން ފުރުވާލާފައިވާ ކަމަށްވެސް އެ ރިސޯޓުން "ވޮއިސް" އަށް ވަނި މައުލޫމާތު ދީފައެވެ.