ރައީސް އަބްދުﷲ ޔާމީން އަބްދުލްގައްޔޫމުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ އާރަށު ހުކުމުގެ މައްސަލަ ބައްލަވާ ބެންޗުގައި ހިމެނޭ ދެ ފަނޑިޔާރުން ޗުއްޓީއަށް ވަޑައިގަތުމާއި ގުޅިގެން އެ މައްސަލަ މަޑުޖެހިއްޖެ އެވެ.

އާރަށުގެ މުއާމަލާތާއި ގުޅުވާ ރައީސް ޔާމިނުގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ އެމަނިކުފާނުގެ މައްޗަށް ޖަލު ހުކުމެއް ކޮށްފައިވަނީ މިދިޔަ ޑިސެމްބަރު މަހުގެ 25 ގައެވެ.

އެ ފަހުން އެމަނިކުފާނުގެ ފަރާތްޕުޅުން ވަނީ އެ މައްސަލަ ހައިކޯޓުގައި އިސްތިއުނާދުކޮށްފަ އެވެ. ރައީސް ޔާމިނުގެ ފަރާތްޕުޅުން އެ މައްސަލަ ހައިކޯޓުގައި އިސްތިއުނާފު ކުރީ މި އަހަރުގެ ފެބްރުއަރީގައެވެ. އެހެން ނަމަވެސް ހައިކޯޓުން އެ މައްސަލަ ބަލައިގެންފައިވަނީ އޭޕްރިލް މަހުގައެވެ. އަދި މައްސަލައިގެ ފުރަތަމަ އަޑުއެހުން ބޭއްވީ ޖޫންމަހުގެ ތެރޭގައެވެ.

Advertisement

ހައިކޯޓު މައްސަލަ ދިގުލައިގެންދާތީ އޭރު ވެސް ރައީސް ޔާމީނުގެ ގާނޫނީ ވަކީލުންނާއި އިދިކޮޅު ލީޑަޝިޕްގެ ބޭފުޅުން ބޮޑެތި ކަންބޮޑުވުންތަކެއް ފާޅުކޮށްފައި ވެއެވެ.

އެ މައްސަލަ ނުނިމި އޮތުން ހުއްޖަތަކަށް ހަދައި ރައީސް ޔާމީންގެ ރިޔާސީ ކެންޑިޑެސީ ބަތިލްކޮށްފައިވާއިރު، އެ ނިންމުމަކީ އެމަނިކުފާނުގެ އިންތިޚާބީ ހައްގެއް ގެއްލިގެން ދިއުންކަމަށް ގާނޫނީ ވަކީލުން ވަނީ ސިފަކުރައްވާފަ އެވެ.

އާރަށު މައްސަލައިގެ އަޑުއެހުންތައް ނިމުމަކާއި ހަމަޔަށް ގޮސްފައިވަނިކޮށް އެ މައްސަލައިގެ އަޑުއެހުންތައް ވަނި މަޑުޖައްސާލާފަ އެވެ. އެންމެ ފަހުން އެ މައްސަލައާއި ގުޅިގެން ތާވަލުކުރި ދެ އަޑުއެހުން ވެސް ދައުލަތުން އެދިގެން ވަނީ ކެންސަލްކޮށްފަ އެވެ.

އެފަހުން އެ މައްސަލަ ބައްލަވާ ދެ ފަނޑޔާރުން ވަނީ ޗުއްޓީއަށް ވަޑައިގެންފަ އެވެ. އެއާއެކު އަނެއްކާވެސް އެ މައްސަލަ މިވަނީ މަޑުޖެހިގެން ގޮސްފައެވެ.