ފަލަސްތީނުގެ ގައްޒާ ފިޔަވައި މުޅި ދުނިޔެ މި އޮތީ އިޒްރާއިލްގެ އަޅުވެތިކަމުގައި ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުالله (މޮސްޓާ) ވިދާޅުވެއްޖެ އެވެ.
މޮސްޓާ މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މި އަހަރުގެ ތިން ވަނަ ދައުރުގެ 14 ވަނަ ޖަލްސާގައި ވާހަކަދައްކަވަމުން ނެވެ.
އިޒްރާއިލުން ފަލަސްތީނަށް ދެމުންދާ ހަމަލާތައް އޮކްޓޫބަރު މަސްތެރޭ ވަރުގަދަކޮށްފައިވާއިރު، އެ ހަމަލާތަކުގައި ފަލަސްތީނުގެ 5000އަށް ވުރެ ގިނަ މީހުން ވަނީ ޝަހީދުކޮށްލާފަ އެވެ.
ފަލަސްތީނަށް އެހީތެރިކަން ފޯރުކޮށްދީ، އެ ގައުމުގައި ހިނގަމުންދާ ގަތުލުއާންމު ހުއްޓުވުމަށް މުޅި ދުނިޔެ ފެއިލްވެފައިވާއިރު، އެކަމަށް އިޝާރާތްކުރައްވާ މަޖިލީހުގައި ވާހަކަދައްކަވަމުން މޮސްޓާ ވިދާޅުވީ ފަލަސްތީނުގެ ގައްޒާ ފިޔަވައި މުޅި ދުނިޔެ އޮތީ އިޒްރާއިލްގެ އަޅުވެތިކަމުގައި ކަމަށެވެ.
"މިއަދު ގައްޒާ ފިޔަވައި މުޅި ދުނިޔެ އޮތީ އިޒްރާއިލްގެ އަޅުވެތިކަމުގައި"
އެކަން ފާހަގަކުރައްވާ މޮސްޓާ ވިދާޅުވީ ފަލަސްތީނު މިނިވަންކުރެވޭނީ ވަރަށް ވަރުގަދަ ޖިހާދެއް ކޮށްގެން ކަމަށެވެ. އެހެން ނަމަވެސް ޖިހާދުގެ ވާހަކައަކީ ދައްކަން ނުކެރޭ ވާހަކައަކަށް ހަދާފައިވާކަމަށް އޭނާ ވިދާޅުވި އެވެ.
ފަލަސްތީނު މިނިވަންކުރާ ވާހަކަ އެކި ޖަލްސާތަކާއި ކޮންފަރެންސްތަކުގައި ދެއްކިދާނެ ކަމަށާއި، އެ ގައުމަށް އިޒްރާއިލް ހުއްޓުމެއްނެތި ހަމަލާތައް ދީ، ގައުމު ސުންނާފަތި ކުރަމުން އެ ގެންދަނީ އެ ވާހަކަތައް ދައްކަދައްކާ ތިއްބައިކަން ހަނދާންކޮށްދެއްވާ މޮސްޓާ ވިދާޅުވީ މުސްލިމު ގައުމަށް އެކަތިގަނޑަކަށްވެ ވަރުގަދަ ޖިހާދެއް ކޮށްގެން ނޫން ގޮތަކަށް ފަލަސްތީނު މިނިވަން ނުކުރެވޭނެ ކަމަށެވެ.
ފަލަސްތީން މިނިވަން ކުރުމަށްޓަކައި މުސްލިމު ގައުމުތައް އެކަތިގަނޑެއްގެ ގޮތުގައި މަސައްކަތްކުރުން މުހިންމުކަން ދީނީ އިލްމުވެރިން ވެސް ގެންދަވަނީ ފާހަގަކުރައްވަމުން ނެވެ.
އޭގެ އިތުރުން ކެރި ކުޅަދާނަކަން ލިބިގެންދާ މިންވަރަކުން ފަލަސްތީނަށް އެހީތެރިކަން ފޯރުކޮށްދިނުމަކީ މުސްލިމެއްގެ ހައިސިއްޔަތުން ކުރުން ލާޒިމްކަމެއްކަން އެ ފަރާތްތައް ފާހަގަކުރައްވަ އެވެ.
Advertisement
This content is created and paid for by advertisers and does not involve Voice Journalists
