އިޒްރޭލަށް ޖާސޫސްކޮށްދިން ކަމުގެ ކުށް ސާބިތުވި އިންޑިއާގެ އަށް މީހަކަށް ގަތަރުން މަރުގެ ހުކުމް އިއްވައިފި އެވެ.
އިންޑިއާ މީޑިއާ ރިޕޯޓުތައް ބުނާގޮތުން މި އަށް މީހުންނަކީ އިންޑިއާގެ ކަނޑުގެ ސިފައިންގެ ރިޓަޔަރޑް އޮފިސަރުންތަކެކެވެ. އަދި ގަތަރު ސަރުކާރަށް ސަބްމެރިން ޕްރޮގްރާމެއްގައި ލަފާ ދިން އަމިއްލަ ކުންފުންޏެއް ކަމަށްވާ އަލް ދަހްރާގައި ވަޒީފާ އަދާކުރާ ބައެކެވެ. އަލް ދަހްރާ އަކީ ސަލާމަތީ އެކި ކަންކަމާ ގުޅޭ ގޮތުން ލަފާދޭ ކުންފުންޏެކެވެ. އަދި މި 8 މީހުން މަސައްކަތް ކޮށްފައިވާ ބައެއް ޕްރޮޖެކްޓް ތަކަކީ ވަރަށް ނާޒުކު ޕްރޮޖެކްޓް ކަމަށްވެސް ބުނެފައިވެއެވެ.
އިޒްރޭލަށް ޖާސޫސްކުރުމުގެ ތުހުމަތަށް އެ އަށް މީހުން ހައްޔަރު ކޮށްފައި ވަނީ މިދިޔަ އަހަރުގެ އޮގަސްޓް މަހުގައި ކަމަށް މީޑިއާ ރިޕޯޓްތައް ބުނާއިރު، އެއިރުން ފެށިގެން އިންޑިއާ ސަރުކާރުން އެމީހުން ސަލާމަތްކުރުމަށް މަސައްފަށާފައިވާ ކަމަށްވެސް ބުނެފައިވެއެވެ. އެހެން ނަމަވެސް އެކަން ކާމިޔާބު ނުވެ އުޅެނިކޮށް މި އަހަރުގެ މާރިޗު މަހުގައި މައްސަލައިގެ އަޑުއެހުންތައް ފެށިގެން ދިޔަ ކަމަށްވެސް ބުނެފައިވެއެވެ.
މި މީހުންގެ މަރުގެ ހުކުމް އިއްވުމާއި ގުޅިގެން ކަންބޮޑުވުން ފާޅުކޮށް، އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ވަނީ އެ މައްސަލާގައި އެ ފަރާތްތަކުގެ އާއިލާއާ ވާހަކަދައްކަމުންދާ ކަމަށެވެ. އަދި މައްސަލަ ވަރަށް ގާތުން ބަލަމުންދާ ކަމަށާ، އެކަމުގައި ގަތަރު ސަރުކާރާ ވާހަކަ ދައްކައި އެމީހުން ސަލާމަތްކުރުމަށް އެޅެން ހުރި ފިޔަވަޅެއް އަޅާނެ ކަމަށްވެސް ބުނެފައިވެއެވެ.
"މި އެންމެންގެ އާއިލާތަކާއި ގާނޫނީ ޓީމާ އެކު މި ދަނީ މަސައްކަތްކުރަމުން. މި ކަމުގައި ހުރިހާ އިހްތިޔާރެއްގެ ވެސް ބޭނުންކުރާނަން،" އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ބުންޏެވެ.
Advertisement
This content is created and paid for by advertisers and does not involve Voice Journalists
