އިންތިހާބީ ރައީސް ޑރ. މުހައްމަދު މުއިއްޒަކީ "ޕްރޯ ޗައިނާ" ސިޔާސަތު ގެންގުޅުއްވާ ބޭފުޅެއް ނޫން ކަމަށާ، އެމަނިކުފާނު މަސައްކަތް ކުރައްވާނީ ހުރިހާ ގައުމަކާއި ގުޅިގެން ކަމަށް ވިދާޅުވެއްޖެއެވެ.

"ބްލޫމްބާގް ޓީވީ" އަށް ދެއްވި އިންޓަވިއުއެއްގައި މުއިއްޒު ވިދާޅުވީ، އެމަނިކުފާނަކީ ޗައިނާއަށް ތާއީދު ކުރާ މީހެއްގެ ގޮތުގައި ވަރަށް ނުބައިކޮށް ލޭބަލް ކޮށްފައިވާ ކަމަށެވެ. ނަމަވެސް ރާއްޖެ ފިޔަވައި އެހެން ގައުމަކަށް ތާއީދު ނުކުރައްވާނެ ކަމަށާއި އެކަމަކީ އެއީ ވިސްނާލުމުން އެނގޭނެ ކަމެއް ކަމަށް މުއިއްޒު ވިދާޅުވިއެވެ.

"ޕްރޯ ޗައިނާ ކަމަށް ބުނެ މީހުން އަޅުގަނޑު ލޭބަލްކޮށްފައި ވަނީ ގޯސްކޮށް. އަޅުގަނޑަކީ ޕްރޯ މޯލްޑިވްސް، އެނޫން އެއްވެސް ގައުމެއް ޕްރޯ އެއް ނޫން،" ޑރ. މުއިއްޒު ވިދާޅުވި އެވެ.

މުޢިއްޒުގެ މި ވާހަކައާއި ގުޅިގެން އެ ނޫހުގެ ރިޕޯޓަރ ވަނީ އިންޑިއާ ކަނޑުގެ ބޮޑު ބަޔަކަށް ޗައިނާއިން ނުފޫޒު ފޯރުވާކަމަށް ފާހަގަކޮށް އެމަނިކުފާނުގެ ވެރިކަމެއްގައި ޗައިނާއާ ރާއްޖެއާމެދު ބާއްވާނެ ގުޅުމާ ގުޅޭ ގޮތުން ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން ޑރ. މުއިއްޒު ވިދާޅުވީ ރާއްޖެއިން ހުރިހާ ގައުމަކާ އެކު ވެސް ގާތުން މަސައްކަތް ކުރާނެ ކަމަށާއި ބައިނަލްއަގުވާމީ ހަމަތަކަށް އިހްތިރާމް ކުރައްވާނެ ކަމަށެވެ. އަދި ބޮޑެތި ގައުމުތަކުގެ މެދުގައި އޮންނަ ވާދަވެރިކަމުގެ ތެރެއަށް ރާއްޖެ ނުވަންނާނެ ކަމަށް ޑރ. މުއިއްޒު ވިދޅުވި އެވެ. 

"އަޅުގަނޑުމެން އަބަދުވެސް މަސައްކަތް ކުރާނީ ހުރިހާ ޤައުމަކާ ގުޅިގެން މަސައްކަތް ކުރުމަށް. ބޮޑެތި ޤައުމުތަކުގެ މެދުގައި ޖިއޮޕޮލިޓިކަލް ވާދަވެރިކަން އުފެދިގެން ދާކަށް އަޅުގަނޑުމެން ބޭނުމެއް ނޫން، އެކަން ކުރުމަށް ރާއްޖެ ވަރަށް ކުޑަ" މުއިއްޒު ވިދާޅުވިއެވެ.

މީގެ އިތުރުން އެ އިންޓަވިއުގައި ވެސް ޑރ. މުއިއްޒު ވަނީ ރިޔާސީ ވައުދާ އެއްގޮތަށް، ރާއްޖޭގައި ތިބި އިންޑިއާ ސިފައިން ރާއްޖެ ދޫކޮށް ދިއުމަށް އަންގާނެ ކަމަށް ވިދާޅުވެފައެވެ.