ވެރިކަމަށް ހުވާކުރައްވާތާ ފުރަތަމަ 100 ދުވަސްތެރޭގައި ހުޅުމާލެ ސިޓީގެ މުނިސިޕަލް ޚިދުމަތްތައް މާލެ ސިޓީ ކައުންސިލަށް ބަދަލުކުރައްވާނެކަމަށް އިންތިޚާބީ ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ ހުޅުމާލެ ސިޓީގެ ރައްޔިތުންނާއި ބައްދަލުކުރުމަށް މިއަދު ހުޅުމާލޭ ފޭސް-1 ގައި ކުރިއަށް ގެންދިޔަ ހަފްލާގައި ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ. 

ޑރ މުއިއްޒު ވިދާޅުވީ ހުޅުމާލެ އަކީ މާލެ ސިޓީ ކައުންސިލްގެ އިހުތިޞާސްގެ ތެރޭގައި އޮތް ތަނެއް ނަމަވެސް އެތަނުގެ މުނިސިޕަލް ޚިދުމަތްތައް ދިނުން ހަވާލުކޮށްފައިވަނީ ސަރުކާރު ކުންފުނި އާބަންކޯއަށް ކަމަށެވެ. 

ރައްޔިތުންނަށް މުނިސިޕަލް ޚިދުމަތްތައް ފޯރުކޮށްދިނުމުގެ ޒިންމާ ކުންފުންޏަކާއި ހަވާލުކޮށްގެން ކުރިއަށް ނުގެންދެވޭނެ ކަމަށާއި، އަދި އެއީ ލާމަރުކަޒީ ގާނޫނު ތަންފީޒު ކުރުމަށް ހުރަސްއެޅިގެންދާ ކަމެއްކަން ޑރ މުއިއްޒު ފާހަގަކުރެއްވި އެވެ. 

އެއާއެކު އިންތިޚާބީ ރައީސް ވިދާޅުވީ ވެރިކަމަށް ހުވާކުރައްވާތާ ފުރަތަމަ 100 ދުވަސްތެރޭގައި ހުޅުމާލެ މުނިސިޕަލް ޚިދުމަތްތައް މާލެ ސިޓީ ކައުންސިލުގެ ދަށަށް ބަދަލުކުރައްވާނެ ކަމަށެވެ. 

އެގޮތުން މަގުތައް ސާފުކޮށް ބެލެހެއްޓުމާއި ފަޅުތެރެ ސާފުކޮށް ބަލަހައްޓާ، މަގުމަތި ދިއްލުމާއި އިދާރީގޮތުން ދޭންޖެހޭ ޚިދުމަތްތައް މާލެ ސިޓީ ކައުންސިލުން ދެމުން ގެންދާނެ ކަމަށް ޑރ މުއިއްޒު ވިދާޅުވި އެވެ.