ރައްޔިތުންގެ މަޖިލީހުގެ މިއަދަށް ތާވަލްކުރި ޖަލްސާ، އެމްޑީޕީ މެންބަރުން ހަމަނުޖެހުން ހިންގުމާއި ގުޅިގެން ކުރިއަށް ނުގެންދެވި، ނިންމާލަން ޖެހިއްޖެ އެވެ. 

މިއަދުގެ ޖަލްސާއަށް އެޖެންޑާކޮށްފައި އޮތީ މި އަހަރަށް ސަރުކާރުން ހުށަހެޅި ސަޕްލެމަންޓަރީ ބަޖެޓާއި، އަންނަ އަހަރަށް ލަފާކުރާ ދައުލަތުގެ ބަޖެޓުގެ މަސައްކަތެވެ. 

ނަމަވެސް އެމްޑީޕީގެ ޕާލިމަންޓު ގުރޫޕުން މަޖިލީހަށް ހުށަހަޅާފައިވާ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާ ނުކޮށް އިތުރު އެއްވެސް މަސައްކަތެއް ދެން ކުރިޔަށް ނުގެންދެވޭނެކަމަށް އިއްޔެވެސް އެމްޑީޕީން ވަނީ ބުނެފައެވެ. އަދި އެ މައްސަލަ އެޖެންޑާ ނުކުރާ ނަމަ، ދެން އެހެން އެއްވެސް ކަމަކަށް އެމްޑީޕީ މެންބަރުންގެ ފަރާތުން އެއްބާރުލުން ނުލިބޭނެ ކަމަށް ވެސް އެ މެންބަރުން ވަނީ ވިދާޅުވެފަ އެވެ. 

Advertisement

އެގޮތުން، މިއަދުގެ ހެނދުނު ޖަލްސާ ފެށުމުގެ ކުރިން ވެސް އެމްޑީޕީ މެމްބަރުން ތިބީ ދުންމާރިތަމާއި އަޑުގަދަ ކުރާތައް ހިފައިގެން ޖަލްސާ ހުއްޓުވުމަށް ތައްޔާރު ވެގެންނެވެ. 

އަދި މަޖިލީހުގެ ރިޔާސަތަށް ވިލުފުށި ދާއިރާގެ މެމްބަރު ހަސަން އަފީފް ވަޑައިގެން ޖަލްސާ ފެއްޓެވުމާއި އެކު ގޮނޑިތަކުން އެމްޑީޕީގެ މެމްބަރުން ތެދުވެ އަޑުގަދަ ކުރަން ވަނީ ފަށާފައެވެ. 

އެއްބައި މެންބަރުން ދުންމާރި ފުންމަމުން ދިޔައިރު އަނެއް ބައެއް މެންބަރުން އަޑުގަދަކޮށް ބުނަމުން ދިޔައީ އިތުރު އެއްވެސް މަސައްކަތަކަށް ޖާގައެއް ނެތްކަމަށާއި، އިތުބާރު ނެތްކަމުގެ މައްސަލަ އެޖެންޑާ ކުރަން ޖެހޭ ކަމަށެވެ.

އަދި ފޭދޫ ދާއިރާގެ މެމްބަރު މުހައްމަދު ނިހާދު އާއި އެހެން ބައެއް މެންބަރުންވެސް ރިޔާސަތުގައި އިންނެވި އަފީފަށް އުނދަގޫ ކުރެއްވުމުގެ ގޮތުން މޭޒު މަތީން ބައެއް ތަކެތި ނެގުމަށް މަސައްކަތް ކުރައްވައި، އަފީފު އެ ގަޔަށްވެސް އަތްލައި ކޮއްޕައި އެކި ގޮތް ގޮތުން އެމްޑީޕީ މެންބަރުން ޖެއްސުން ކުރައްވަމުން ދިޔަތަން ވަނީ ފެނިގެންގޮސްފައެވެ. 

މީގެ އިތުރުން ރިޔާސީ މޭޒު ކައިރީގައި ތިއްބެވި އިދާރީ މުވައްޒަފުންގެ ތެރެއިން އަމީން އާންމު ފާތިމަތު ނިއުޝާ އާއި ކައުންސެލް ޖެނެރަލް ފާތިމަތު ފިލްޒާއަށް ވެސް އެމްޑީޕީ މެމްބަރުން އުނދަގޫކޮށް ބަސް ބުނާ މަންޒަރު ފެނެ އެވެ.

އެފަދައިން މުޅި މަޖިލިސް ހަލަބޮލި ވެފައި ވަނިކޮށް ވަކި ހިސާބަކުން މަޖިލިސް ވަގުތުން ދުރަށް ދެއްކުންވަނީ ހުއްޓާލާފައެވެ.