ޖަރުމަނު ކަޕުގެ ތިންވަނަ ބުރުގައި ރޭ އަމިއްލަ ދަނޑުގައި ފަހަތުން އަރައި 2-1 ގެ ނަތީޖާއަކުން ގަދަ ބަޔާން މިއުނިކް ބަލިކޮށް ޖަރުމަނު ތިންވަނަ ޑިވިޝަން ލީގު ތާވަލުގެ 15 ވަނައިގައި މިވަގުތު އޮތް ސާރބްރަކެން އިން މުބާރާތުގެ ދެވަަނަ ބުރުން ޖަގަ ހޯދައިފިއެވެ. 

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ބަޔާން މިއުނިކުން މެޗު ޑޮމިނޭޓުކުރި އިރު، މިމެޗުގައި ފުރަތަަމަ ލަނޑުޖަހައި ކުރިހޯދީ ވެސް އެޓީމުންނެވެ. މިލަނޑު ފުރަތަމަ ހާފުގެ 16 ވަނަ މިނެޓުގައި ކާމިޔާބުކޮށްދިނީ އެޓީމުގެ ތަޖުރިބާކާރު މިޑްފިލްޑަރު ތޯމަސް މުލާ އެވެ. މިއީ އެޓީމުގެ ޒުވާން މިޑްފިލްޑަރު ފްރަންސް ކްރަޓްޒިގް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ނަމަވެސް ފުރަތަމަ ހާފު ނިމުމުގެ ކުރިން ސާރބްރަކެން ވަނީ ލަނޑެއް ކާމިޔާބުކޮށް ބަޔާން މިއުނިކް ސިއްސުވާލާފައެވެ. މިލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ ޕެޓްރިކް ސޮންތެއިމަރ އެވެ. މިއީ އެޓީމުގެ ޑިފެންޑަރު ލޫކަސް ބޮއެޑާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

މެޗުގެ ދެވަަނަ ހާފުގައި ބަޔާން މިއުނިކުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. އަދި މިހާފުގައި އެޓީމުން ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކުރި ނަމަވެސް ސާރބްރަކެން ފަހަތަށް ކުޅޭ ކުޅުންތެރިން ވަނީ ބަޔާންގެ އެޓޭތައް ހުއްޓުވުމުގައި ރޭވުންތެރިކަމާއެކު މޮޅު ޑިފެންސިވް ކުޅުމެއް ދައްކަދީފައެވެ.

މިމެޗުން ސާރބްރަކެން މޮޅުވި ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ތަޖުރިބާކާރު ޑިފެންޑަރު މާސެލް ގައުސް އެވެ. މިއީ އެޓީމުގެ މިޑްފިލްޑަރު ޓިމް ސިވެޖާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ސާރބްރަކެން ކުރީގައި އޮވެގެންނެވެ.