ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ޒޯން ޗެމްޕިއަނުންގެ މެދުގައި ކުޅެވޭ ރިސޯޓް ސުޕަރ ލީގު ކުއާޓާ ފައިނަލް ތިންވަނަ މެޗުގެ ފުރަތަަމަ ލެގުގައި މިއަދު ހަވީރު ވަން އެންޑް އޮންލީ ރީތިރަށް މޯލްޑިވްސް އާއި ކްރޮސްރޯޑްސް މޯލްޑިވްސް ވާދަކުރި މެޗު ފަސޭހަކަމާއި 5-0 ގެ ނަތީޖާއަކުން ކާމިޔާބުކޮށް ކްރޮސްރޯޑްސް އިން މުބާރާތުގެ ސެމީ ފައިނަލުގެ ފުރުސަތު ބޮޑުކޮށްފިއެވެ.

ހޯމް އެންޑް އަވޭގެ އުސޫލުން ކުރިޔަށްދާ މިއަހަރުގެ ރިސޯޓް ސްޕަރ ލީގުގައި 6 ޓީމު ވާދަކުރާއިރު، މުބާރާތުގެ ޗެމްޕިއަން ޓީމަށް 100,000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ. އަދި ކުއާޓާ ފައިނަލުގެ ތިން މެޗުން މޮޅުވާ ތިން ޓީމުގެ މެދުގައި ގުރުއަތު ހޮވޭ ޓީމަކަށް މުބާރާތުގެ ފައިނަލުން ޖާގަ ލިބޭއިރު، ފައިނަލުގެ ދެވަނަ ޖާގަ ލިބިގެންދާނީ ބާކީ އޮތް ދެޓީމުގެ މެދުގައި ކުޅެވޭ ސެމީފައިނަލްގެ މެޗުން މޮޅުވާ ޓީމަކަށެވެ.

ވަން އެންޑް އޮންލީ ރީތިރަށް މޯލްޑިވްސްގައި މިއަދު ހަވީރު ކުޅެވުނު މެޗުގެ ފުރަތަަމަ ހާފުގައި ކްރޮސްރޯޑްސްގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު މި ހާފުގައި އެޓީމުން ވަނީ ހަތަރު ލަނޑުގެ ލީޑެއް ހޯދާފައެވެ.

އެގޮތުން ފުރަތަމަ ހާފުގައި އެޓީމުގެ ނޫހް އިބްރާހިމް އާއި ޝިފާޒް އާދިލް މިއިން ކޮންމެ ކުޅުންތެރިއެއް ދެލަނޑު ކާމިޔާބުކުރިއިރު، މިމެޗުގައި އެޓީމުން ކާމިޔާބުކުރި ފަސްވަނަ ލަނޑަކީ މެޗުގެ ދެވަަނަ ހާފުގައި ރީތިރަށުގެ އަހުމަދު ނަބީލް އަތުން ބައިކޮޅަށް ވަން ލަނޑެކެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ކްރޮސްރޯޑްސްގެ ނޫހް އިބްރާހިމް އެވެ.

މިދެޓީމު މެދުގައި ކުޅެވޭ ކުއާޓާ ފައިނަލުގެ ދެވަނަ ލެގް މިމަހުގެ ހަތަރުވަނަ ދުވަހުގެ ހަވީރު ކްރޮސްރޯޑްސްގައި ކުޅުމަށް ހަމަޖެހިފައިވާއިރު، އެމެޗު އެއްވަރުވެ، ނުވަތަ ހަތަރު ލަނޑަށްވުރެ ކުޑަ ތަފާތަކުން ބަލިވި ނަމަވެސް މުބާރަތުގެ ސެމީފައިނަލްގެ ތިންވަނަ ޖާގަ ލިބިގެންދާނީ ކްރޮސްރޯޑްސް އަށެވެ.