އޮންލައިންކޮށް ވިނަރެސްގެ އެޕާޓެމެންޓުތައް ވިއްކަން އިއްޔެ ހުޅުވާލުމާއެކު ޕޯޓަލް އަށް ދިމާވި ޓެކްނިކަލް މައްސަލަތަކާ ގުޅިގެން އެ އެޕާޓްމެންޓުތައް ވިއްކުން މަޑުޖައްސާލައިފި އެވެ.

އާބަންކޯއިން ނެރުނު ބަޔާނުގައި ބުނީ، ވިނަރެސް ގަތުމަށް އެޕްލިކޭޝަން ފޯމް ހުށަހެޅުމަށް ހުޅުވާލެވުނު ވަގުތު އޮންލައިން ޕޯޓަލްއަށް މެދުވެރިވި ޓެކްނިކަލް މައްސަލަތަކާ ގުޅޭ ގޮތުން ވަރަށް ގިނަ ޝަކުވާތަކެއް އެ ކޯޕަރޭޝަނަށް ލިބިފައިވާ ކަމަށެވެ.

އެހެން ކަމުން އެ ލިބިފައިވާ ޝަކުވާތަކާއި ގުޅިގެން އިތުރަށް ބަލަންޖެހޭ ކަންތައްތަކެއް ހުރި ކަމަށް އެ ކޯޕަރޭޝަނަށް ފާހަގަ ކުރެވިފައިވާތީ އެޕާޓްމެންޓު ގަތުމަށް އޮންލައިން ޕޯޓަލް މެދުވެރުކޮށް ފޯމް ހުށަހެޅުން މަޑުޖައްސާލުމަށް ނިންމައިފައިވާ ކަމަށް ބުނެފައިވެއެވެ.

އަދި އެ މައްސަލަ ހައްލު ކުރުމަށްފަހު ވިނަރެސް އެޕާޓްމަންޓްތައް އަލުން ގަންނަން ހުށަހެޅުމުގެ ފުރުސަތު ހުޅުވާލާނެ ތާރީޚެއް ފަހުން އިއުލާނު ކުރެވޭނެ ކަމަށާ، އެކަމާއި ގުޅޭ އިތުރު މައުލޫމާތު ހޯދުމަށް 1516 އަށް ގުޅާ ލުމަށް އާބަންކޯއިން އެދިފައިވެއެވެ. 

ވިނަރެސްގެ ނުވިކި ހުރި އެޕާޓްމެންޓުތައް ވިއްކަން ހުޅުވާލީ ނޮވެމްބަރު 5 ގެ ހެނދުނު 10:00 ގަ އެވެ. އޮންލައިންކޮށް ފޯމު ހުށަހެޅުމަށް ހުޅުމާލި އެ ފުރުސަތު ގައި، ނުވިކި ހުރި 123 އެޕާޓްމެންޓު ގާތްގަނޑަކަށް ބައިގަޑިއިރު ތެރޭގައި ވިކިފައިވާ ކަމަށް އާބަންކޯއިން އިއްޔެ ބުންޏެވެ.

ނަމަވެސް، އެއްފަހަރާ އެތައް ބަޔަކު ޕޯޓަލް އަށް ވަންނަން މަސައްކަތް ކުރުމުގެ ސަބަބުން ގިނަ ބަޔަކަށް ޕޯޓަލް އަށް ނުވަދެނު ކަމުގެ ޝަކުވާތައްވެސް މީހުން ވަނީ ކޮށްފައެވެ.