ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ ގަރާރު އިއްވާ ޖަލްސާގެ ރިޔާސަތު ބަލަހައްޓާނެ ފަރާތަކަާއިމެދު، އެޓާނީ ޖެނެރަލްގެ އޮފީހާއި، ރައްޔިތުންގެ މަޖިލީހު އިދާރާގެ ސްޓޭންޑުގައި ހިލާފުތަކެއް އުޅޭއިރު ޝަރީއަތުގައި އެޓާނީ ޖެނެރަލްގެ އޮފީހުން މަޖިލިސް ތަމްސީލު ކުރުމަށް ސުވާލު އުފައްދައި ޕީޕީއެމް/ޕީއެންސީން އިއުތިރާޒެއް ހުށަހަޅައިފިއެވެ.

ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިތުބާރު ނެތްކަމަށް ރައްޔިތުންގެ މަޖިލިހުގެ 49 މެމްބަރުގެ ސޮޔާއެކު އެމްޑީޕީން ހުށަހެޅި މައްސަލަ ކުރިއަށް ނުގެންދެވި ދިގު ދެމިގެންދާ މައްސަލައިގައި މަޖިލިހުގެ ގަވާއިދު މާނަ ކޮށްދިނުމަށް އެދި އެމްޑީޕީން ވަނީ ސުޕްރީމް ކޯޓަށް ހުށަހަޅައިފައެވެ.  މި މައްސަލައިގައި ރައްޔިތުންގެ މަޖިލިހުގެ ފަރާތުން ތަމްސީލުކުރައްވަނީ އެޓާނި ޖެނަރަލް އިބްރާހިމް ރިފްއަތެވެ. 

އެހެންނަމަވެސް މަޖިލިހުގެ ރައީސް ވަކި ކުރާ ގަރާރުހުށަހަޅާ ޖަލްސާގެ ރިޔާސަތު ބެލެއްހެއްޓުމާއި ގުޅޭގޮތުން އެމްޑީޕީގެ ފަރާތުން ސުޕްރީމް ކޯޓަށް ހުށަހެޅި މައްސަލައިގައި މަޖިލިސް ތަމްސީލު ކުރައްވާ އެޓާރނީ ޖެނަރަލް އިބްރާހިމް ރިފްއަތުގެ ސްޓޭންޓް މި މައްސަލައިގައި މަޖިލިހުގެ ސްޓޭންޑާއި ތަފާތެވެ. 

މި މައްސަލާގައި އެޓާނީ ޖެނެރަލްގެ އޮފީހުގެ ސްޓޭންޑަކީ އެމްޑީޕީން ވަކާލާތު ކުރާ ގޮތެވެ. މީގެ ކުރިން އެޓާނީ ޖެނެރަލް އިބްރާހިމް ރިފްއަތު އެ ގޮތަށް ގާނޫނީ ލަފާ ވެސް ވަނީ ދެއްވައިފައެވެ.

ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ބ. ގައި އޮންނަނީ ރައްޔިތުންގެ މަޖިލީހުގެ ރައީސް މަގާމުން ވަކިކުރުމަށް ހުށަހަޅައިފައިވާ މައްސަލައަށް ގޮތެއް ނިންމުމުގެ ޖަލްސާގެ ރިޔާސަތު ބަލަހައްޓަން ޖެހޭނީ ނައިބު ރައީސް ކަމަށެވެ. އެހެންނަމަވެސް އެ ގަވާއިދުގައި ނައިބު ރައީސަށް ރިޔާސަތު ނުބެހެއްޓޭ ހާލަތެއްގައި ވާނެ ގޮތެއް ގަވައިދުގެ 205 ވަނަ މާއްދާގައި ނޯވެއެވެ. އެހެންވެ މަޖިލީހުން އެ ކަމަށް އެކަނި ރިއާޔަތްކޮށް، މަޖިލީހުގެ ނައިބު ރައީސް އީވާ އަބްދުالله އާލާސްކަންފުޅާ އުޅުއްވާ ކަމަށް ވިދާޅުވެ ސަލާމުގައި ހުންނެވުމުން މަޖިލީހުގެ ޖަލްސާއެއް ވަނީ ކެންސަލް ކޮށްފައެވެ.

ރައްޔިތުގެ މަޖިލިހުގެ ގަވާއިދުގެ 44 ވަނަ މާއްދާއާ ހަވާލާދީ އެމްޑީޕީން ސުޕްރީމް ކޯޓަށް ހުށަހެޅި މި މައްސަލައިގައި އެމްޑިޕީން ހުށަހަޅައިފައިވާ މާއްދާގައި ވަނީ މަޖިލީހުގެ ރައީސާއި ނައިބު ރައީސަށް ރިޔާސަތު ނުބެހެއްޓޭ ވަގުތު ރިޔާސަތު ބަލަހައްޓަން ފަސް މެންބަރަކު ކަނޑައަޅާފައި އޮންނަން ޖެހޭކަމެވެ.

މިއަދުގެ އަޑުއެހުމުގައި ޕީޕީއެމް/ޕީއެންސީގެ ވަކީލު އާޒިމާ ޝަކޫރު ވިދާޅުވީ އެޓާނީ ޖެނެރަލްގެ އޮފީހުން ޝަރީއަތަށް އަރުވާފައިވާ ޖަވާބާއި ރައްޔިތުންގެ މަޖިލީހުގެ ސްޓޭންޑްގައި ހިލާފުތަކެއް ހުރިއިރު އެޓާނީ ޖެނެރަލްގެ އޮފީހުން ރައްޔިތުންގެ މަޖިލިސް ތަމްސީލްކުރާނެ ގޮތް ނުވިސްނޭ ކަމަށެވެ.

އެޓާނީ ޖެނެރަލްގެ ނިންމުމަކީ ޝަރީއަތުން ވިސްނަން ޖެހޭ ކަމަށް ވިދާޅުވެ އާޒިމާ ވަނީ ދައުލަތުން ރައްޔިތުންގެ މަޖިލިސް ތަމްސީލް ކުރުމުގައި އުސޫލުތަކެއް ވެސް ނަަގަހައްޓަވާފައިވާ ކަން ފާހަގަ ކުރައްވައިފައެވެ. 

އެހެން ނަމަވެސް ޝަރީއަތުގެ މަޖިލިސް ކުރިއަށް ގެންދަނީ ދައުލަތުގެ ސްޓޭންޑް އެޓާނީ ޖެނެރަލްގެ އޮފީހުން ވަކާލާތު ކުރާ ގޮތަށެވެ. އަދި ރައްޔިތުންގެ މަޖިލީހުގެ ކައުންސިލަ ޖެނެރަލް ފާތިމަތު ފިލްޒާ ގެންދަވަނީ މަޖިލީހުގެ ނިންމުމާ ގުޅޭ ގޮތުން ޝަރީއަތުގައި ޖަވާބުދާރީ ވަމުންނެވެ.   

ސުޕްރީމް ކޯޓުގެ ފަރާތުން މަސައްކަތް ކުރަނީ މިއަދު ހަވީރު 3:00 އާއި ހަމައަށް މި މައްސަލައިގެ އަޑުއެހުންތައް އެއްކޮށް ނިންމުމަށެވެ. ކުރަން ހުރި ބަހުސްތައް ނުނިމޭނަމަ މާދަމާ އަޑުއެހުމެއް ބާއްވާނެ ކަމަށް ވެސް ރިޔާސަތުން އިއުލާން ކުރެއްވިއެވެ.

އެއިރު މައްސަލައަށް ތަދައްހުލްވި ޑިމޮކްރެޓްސްއިން ވަނީ ބުރާސްފަތި ދުވަހުގެ ނިޔަލަށް ފުރުސަތުތަކެއް ދިނުމަށް އެދިފައެވެ. މަޖިލީހުގެ ރައީސް ނަޝީދާއި، ނައިބު ރައީސް އީވާ ނިސްބަތް ވަނީ ޑިމޮކްރެޓްސްއަށެވެ. އަދި އެއީ މިހާރު މަޖިލީހުގެ މައިނޯރިޓީ ޕާޓީއެވެ.

ދެން މައްސަލައަށް ތަދައްހުލްވި ޕީޕީއެމް/ޕީއެންސީގެ ނުވަ މެންބަރަކު މަޖިލީހުގައި ތިއްބަވައެވެ. 

މި މައްސަލަ ކުރިއަށް ގެންދަނީ ފަސް ފަނޑިޔާރުންގެ ބެންޗަކުންނެވެ. ރިޔާސަތުގައި އިންނެވީ ފަނޑިޔާރު މަހާޒު އަލީ ޒާހިރެވެ. ދެން ތިއްބެވީ ފަނޑިޔާރު ހުސްނުއްސުއޫދާއި، ފަނޑިޔާރު އަޒްމިރަލްދާ ޒާހިރާއި، ފަނޑިޔާރު އަލީ ރަޝީދާއި، ފަނޑިޔާރު ޑރ. އިބްރާހިމް މުހައްމަދެވެ