އަންނަ އަހަރަށް ލަފާ ކުރާ ދައުލަތުގެ ބަޖެޓް ހުށައަޅަން ފިނޭންސް މިނިސްޓަރު މަޖިލީހަށް ވަޑައިނުގަތުމަށް ބަންޑާރަ ނައިބަށް ލަފާ ނުދެއްވޭނެ ކަމަށް ކުރީގެ ބަންޑާރަ ނައިބް އަލްއުސްތާޒާ އައިޝަތު އާޒިމާ ޝަކޫރު ވިދާޅުވެއްޖެއެވެ.
މިފަދައިން އާޒިމާ ވިދާޅުވީ، މިއަދު ސުޕްރީމް ކޯޓުގައި ބޭއްވުނު ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައިގެ އަޑު އެހުމުގައި ވާހަކަފުޅު ދައްކަވަމުންނެވެ.
ޕީޕީއެމް/ޕީއެންސީ ތަމްސީލު ކުރާ ވަކީލެއްގެ ހައިސިއްޔަތުން ކޯޓުގައި ވާހަކަފުޅު ދައްކަވަމުން އާޒިމާ ވިދާޅުވީ ރައްޔިތުންގެ މަޖިލީހުގެ ގަވާއިދުގައި ބުނާގޮތުން ބަޖެޓް ހުށައަޅަން ޖެހޭނީ ރައްޔިތުންގެ މަޖިލީހުގެ ޖަލްސާއެއްގައި ކަމަށެވެ. އަދި މި ބަޖެޓް ހުށައެޅުއްވޭނީ ފައިނޭންސް މިނިސްޓަރު މަޖިލީހަށް ވަޑައިގެން ކަމަށާއި، ދައުލަތުގެ ބަޖެޓް ހުށައެޅުމަށް މަޖިލީހަށް ވަޑައިނުގަތުމަށް ބަންޑާރަ ނައިބަކަށް ލަފާދެއްވުމުގެ ބާރެއް ނޯންނާނެ ކަމަށެވެ.
ދައުލަތުގެ ބަޖެޓަކީ އާދައިގެ ގޮތަކަށް ދޫކޮށްނުލެވޭނެ ކަމެއް ކަމަށާއި ބަންޑާރަ ނައިބު ދެއްވާ ލަފަޔަކުން ދުސްތޫރީ އޮނިގަނޑޫ ހުއްޓުމަކަށް އައިސްގެން ނުވާނެ ކަމަށް ގަބޫލުކުރައްވާކަމަށް ވެސް ވިދާޅުވިއެވެ.
" ދައުލަތުގެ ބަޖެޓަކީ މުސާރަވެސް މެ. ބަޖެޓަކީ މުވައްސަސާތައްވެސް, ބިލްތަކާއި އެހެން ހުރިހާ އެއްޗެއްވެސް މެ. އެެހެންވެއްޖެ ކަމަށް ވާނަމަ، ބަޖެޓް ހުށަނޭޅި, ބަޖެޓް ފާސް ނުވެއްޖެނަމަ ގާނޫނު އަސާސީ އޮތް ގޮތުން އިތުރު ޚަރަދެއް ނުކުރެވޭނެ. މިއަހަރު ނިމުނީމައި އަޅުގަނޑުމެންނަށް ގަބޫލެއް ނުކުރެވޭ އަނެއްކާވެސް ގާނޫނީ އިމުގެ ތެރެއިން މަޖިލީހުގެ ރައީސް އިތުބާރު ނެތްކަމުގެ ވޯޓުގެ ނޯޓިސްގެ ގަރާރުގެ މުއްދަތު ހަމަވުމަށްފަހު އިތުރު ކަމެއް ނުކުރެވޭނެ އޭ ބުނާ ބުނުމަށް ޖާގަ ލިބޭނެ ކަމަކަށް." އާޒިމާ ވިދާޅުވިއެވެ.
މީގެ އިތުރުންވެސް އާޒިމާ ޝަކޫރު ފާހަގަ ކުރެއްވީ ދިވެހި ރާއްޖޭގެ ދުސްތޫރީ ނިޒާމް ވަނީ ހުއްޓިފައިކަމަށާއި އިންތިޚާބެއް ނިމިގެން ދިޔައިރު ރައްޔިތުންގެ މަޖިލީހެއް ނުހިނގާ ކަމަށެވެ.
Advertisement
This content is created and paid for by advertisers and does not involve Voice Journalists
