ހުޅުމާލޭގެ ބިންތަކެއް ކުއްޔަށް ދޭން އުޅޭ މައްސަލައެއްގައި އެންޓި-ކޮރަޕްޝަން ކޮމިޝަން (އޭސީސީ) އިން އާބަންކޯ އަށް ވަދެއްޖެ އެވެ.

މިކަމާއި ގުޅިގެން އޭސީސީގެ މީޑިއާ އޮފިޝަލް "ވޮއިސް" އަށް މަޢުލޫމާތު ދެއްވަމުން ވިދާޅުވީ، އިންތިގާލީ މަރުހަލާގައި ބައެއް ކަންކަން ކުރިއަށް ނުގެންގޮސް މަޑު ޖައްސާލުމަށް ނިމިދިޔަ އޮކްޓޯބަރ މަސް ތެރޭގައި، އޭސީސީން އާބަންކޯއަށް އަންގާފައިވާނެ ކަމަށެވެ. 

އެގޮތުން، އާބަންކޯއިން ކުރުމަށް ނިންމާފައިވާ ބިމާއި ބެހޭ ބައެއް މުޢާމަލާތް ތަކާއި އެނޫންވެސް ބައެއް ކަންކަން މަޑުޖައްސާލުމަށް އޭސީސީން އަންގާފައިވާނެ ކަން މީޑިއާ އޮފިޝަލް ފާހަގަކުރެއްވިއެވެ. 

"އޭގެ ތެރޭގައި ހިމެނޭނެ ފަރުކޮޅު ފުށި ދިގު މުއްދަތަކަށް ކުއްޔަށް ދިނުން ފަދަ އެކިއެކި ކަންކަން. އެކަންކަން އިންތިގާލީ މަރުހަލާގައި ކުރިއަށް ނުގެންދިޔުމަށް އަޅުގަނޑުމެން އަންގާފައި ވާއިރު، އެކަން ކަމާއި ގުޅޭގޮތުން މައުލޫމާތު ހޯދައި ލިޔެކިޔުންތައް ޗެކު ކުރުން ފަދަ ކަންކަން ކުރިއަށް ގެންދިޔުމަށް އޭސީސީގެ ޓީމެއް އަންނަނީ އާބަންކޯގައި ހަރަކާތްތެރިވަމުން." އޭސީސީގެ މީޑިއާ އޮފިޝަލް ވިދާޅުވިއެވެ. 

ބިމުގެ މައްސަލައެއްގައި އޭސީސީން އާބަންކޯއަށް ވަދެފައި ވާއިރު, ވެރިކަން ބަދަލުވުމުގެ މަރުހަލާ ހިނގަމުން ދަނިކޮށް އާބަންކޯ އިން ހުޅުމާލޭގެ ބިންތަކެއްގެ ވިޔަފާރީގެ މުއާމަލާތްތަކެއް ނިންމުމުގެ މަސައްކަތް ފަށާފައިވާތީ އެކަން ކަން މަޑު ޖައްސާލަން މިދިޔަ މަސް ތެރޭ އޭސީސީން ވަނީ އާބަންކޯއަށް އަންގާފައެވެ.

އެގޮތުން އޭސީސީން ނެރުނު ބަޔާނެއްގައި ބުނެފައިވާގޮތުން، އިންތިގާލީ މަރުހަލާގައި އަވަސް އަރުވާލައިގެން އެ ބިންތަކާ ގުޅޭ ވިޔަފާރީގެ މުއާމަލާތްތައް ހިންގުމަކީ އެ އޮފީހުން ކަންބޮޑުވާ ކަމެއް ކަމަށެވެ. އަދި ވަކިން ހާއްސަކޮށް މި މުއާމަލާތްތަކުގެ ތެރޭގައި ބޭރުގެ ފަރާތްތަކަށް ބިން "ލީޒް"ކުރުމުގެ މުއާމަލާތްތަކެއް ހިމެނޭތީ އެއީ ވަކިން ބޮޑަށް ކަންބޮޑުވާ މައްސަލައެއް ކަމަށްވެސް ބުންޏެވެ.

އާބަންކޯ އިން މިދަނޑިވަޅުގައި ބިންތަކުގެ މުއާމަލާތްތައް ނިންމައިފިނަމަ އެކަމުގެ ސަބަބުން އަލަށް ފެށޭ ސަރުކާރުގެ ސިޔާސަތުތައް ހިންގުމަށް ހުރަސްއެޅި މުޅި ދިވެހި ދައުލަތަށް އެކަމުގެ ގެއްލުން ލިބުމުގެ ފުރުސަތު އޮންނާނެ ކަމަށްވެސް ބަޔާނުގައި ފާހަގަކޮށްފައިވެ އެވެ. އެހެންވެ މި މަރުހަލާގައި މިފަދަ މުއާމަލާތްތައް މަޑުޖައްސާލައި ހުރިހާ އިދާރާތަކާއި މުއައްސަސާތަކާއި ކުންފުނިތަކުން، އިންތިގާލީ މަރުހަލާގެ ރޫހާ އެއްގޮތަށް އަމަލުކުރުމަށްވެސް އިލްތިމާސްކޮށްފައިވެ އެވެ.

"އަދި ދަންނަވަމެވެ. މިފަދަ ކަންކަން ހުއްޓުވައި ދިވެހި ރައްޔިތުންގެ މަތީ މަސްލަހަތުތައް ޙިމާޔަތްކުރުމަށް ގާނުނީ ނިޒާމުގެ ތެރެއިން މުއައްސަސާތައް މެދުވެރިކޮށް ކުރަންޖެހޭ މަސައްކަތްތައް ކުރާނެކަމުގެ ޔަގީންކަން ދިވެހި ރައްޔިތުންނަށް އަރުވަމެވެ." ބަޔާން ނިންމާލަމުން އޭސީސީން ބުނެފައިވެ އެވެ.