ފަލަސްޠީނުގެ މިނިވަންކަމަށްޓަމައި ޖިހާދުކުރަމުންދާ ހަމާސްގެ މުޖާހިދުންނާއި އެ ގައުމުގެ އާއްމުން، ނިރުބަވެރި އިސްރާއީލުގެ ސިފައިންނާ ދެކޮޅަށް ކުރަމުންދާ ޖިހާދު ގައި ބައިވެރިވުމުގެ ފުރުސަތު އޮތް ނަމަ، އެ ހަނގުރާމާގައި ބައިވެރިވެ މުސްލިމުންނަށް ނަސްރު ހޯދައިދިނުމަށް ޖިހާދު ކުރުމަކީ ކުރަންޖެހޭ ކަމެއް ކަމަށް މަޝްހޫރު ދީނީ ޢިލްމުވެރިޔާ އައްޝެއިޚު އަހުމަދު ސަމީރު ވިދާޅުވެއްޖެއެވެ. 

'ދާރިސް' ޓީވީން ގެނެސްދޭ ޢިލްމީ ޚަޒާނާގެ 501 ވަނަ ޕްރޮގްރާމް ގައި ފަލަސްތީނުގައި މިހާރު ހިނގަމުންދާ ކަންކަމާއި ގުޅިގެން މީހަކު ކުރި ސުވާލު ތަކަކަށް ޖަވާބު ދެއްވަމުން ޝެއިޚް ސަމީރު ވިދާޅުވީ، ރަސޫލާ ޞައްލައްالله ޢަލައިހި ވަސައްލަމްގެ ހަދީޘްފުޅުތަކުން އެނގިގެންދާ ގޮތުން، މުސްލިމުންނަނީ އެއް އުއްމަތެއްގެ ބައެއް ކަމަށާ، އަދި މުއުމިނުންގެ މިސާލަކީ އެއް ހަށިގަނޑެއްގެ މިސާލު ކަމަށެވެ. 

އެހެން ކަމުން އުއްމަތުގެ މުސްލިމުންނަށް ކޮންމެ ތަނެއްގައިވެސް އަނިޔާ ލިބެމުންދާނަމަ، އެމީހުންނަށް އެހީވުމުގައި މުޅި އުއްމަތް މަސައްކަތް ކުރަންޖެހޭ ކަމަށް ޝެއިޚް ސަމީރު ވިދާޅުވި އެވެ. 

ޢިލްމީ ޚަޒާނާ ޕްރޮގްރާމްގެ ތެރެއިން-- ފޮޓޯ/ދާރިސް ޓީވީ 

ޝެއިޚް ސަމީރު އިތުރަށް ވިދާޅުވީ، ފަލަސްތީނުގެ މުސްލިމުން ކުރަމުންދާ ހަނގުރާމަ ކުރަމުންދަނީ މުސްލިމުންގެ މުގައްދަސް ބިމެއްގެ ހިމާޔަތުގައި ކަމަށެވެ. 

ކަންމިހެން ހުރުމުން މުސްލިމު ގައުމުތަކުގެ ވެރިން، އެމީހުންނަށް ވީ މިންވަރަކުން، އެމީހުންނަށް ލިބިފައިވާ ބާރުގެ ބޭނުންކޮށް ފަލަސްތީނަށް އެހީވުމަށް މަސައްކަތް ކުރަންވާނެ ކަމަށާ، އަދި އާއްމު ފަރުދުންވެސް، އެމީހަކަށްވީ މިންވަރަކުން މާލީ ގޮތުންނާއި، އަދި އެނޫން ގޮތް ގޮތުންވެސް ފަލަސްތީނަށް އެހީވުމަށް މަސައްކަތް ކުރަންޖެހޭނެ ކަމަށް ޝެއިޚް ވިދާޅުވި އެވެ. ހަމައެއާއެކު މުސްލިމުންނަށް ނަސްރު ދެއްވުން އެދިވެސް ހެޔޮ ނިޔަތުގައި، އިތުބާރާއި ޔަގީން ކަމާއި އެކު ދުޢާ ކުރަންޖެހޭ ކަމަށްވެސް ޝެއިޚް ވިދާޅުވި އެވެ. 

މިއާއެކު ޝެއިޚް ސަމީރު ވިދާޅުވީ، ފަލަސްތީނުގެ ރައްޔިތުން ކުރަމުންގެންދާ ޖިހާދަކީ އެންމެހާ މުސްލިމުންގެ މަތިން ކުރަމުންދާ ޖިހާދެއް ކަމަށެވެ.

ޝެއިޚް ސަމީރު ވިދާޅުވީ، ހުޅަނގުގެ ގައުމުތަކުން ޔަހޫދީން ހިންގަމުންދާ ގަތުލު އާއްމު ތަކަށް ތާއީދުކޮށް، އެކަމުގައި ޔަހޫދީންނާ އެކު ވާކަމަށް އަންގައި އެހީތެރިކަންވެސް ފޯރުކޮށްދެމުން އަންނައިރު، މުސްލިމުންވެސް، މުސްލިމު އުއްމަތަށް އެހީވެ، މުސްލިމުންނާއެކު ވާކަން އަންގަންޖެހޭ ކަމަށެވެ. 

އޮކްޓޫބަރު 7 ވަނަ ދުވަހު އިޒްރާއިލްގެ ޔަހޫދީން ފެށި ޤަތުލު ޢާންމު ތަކުގައި މިހާތަނަށް ޣައްޒާގެ 10,500 އަށްވުރެ ގިނަ މީހުން ޝަހީދުކޮށްލާފައިވާއިރު، އޭގެ ތެރޭގައި 4100 އަށް ވުރެ ގިނަ ކުދިން ހިމެނެއެވެ. އަދި 1500 އާއި ގާތް ކުރާ ޢަދަދަކަށް ކުޑަކުދިން ވެއްޓިފައިވާ ޢިމާރާތް ތަކުގެ ދަށުގައި ތާށިވެފައިވެއެވެ.