އެކުވެރިކަމުގެ މެޗެއްގައި  މިއަދު ހެނދުނު އަމިއްލަ ދަނޑުގައި ނިއުޔޯކް ސިޓީ އާއި ދެކޮޅަށް ކުޅުނު މެޗުން 2-1 ގެ ނަތީޖާއަކުން އިންޓަ މިއާމީ ބަލިވެއްޖެ އެވެ.

މިމެޗަކީ އާޖެންޓީނާ ކެޕްޓަން ލިއޮނަލް މެސީ އޭނާގެ 8 ވަނަ ބެލެންޑޯ އެވޯޑް ކާމިޔާބުކުރި ފަހުން އިންޓަ މިއާމީގެ ޖާޒީގައި ކުޅުނު ފުރަތަމަ މެޗެވެ. އަދި މިމެޗުގައި އިންޓަ މިއާމީގެ ފުރަތަމަ އެގާރައިގައި މެސީގެ އިތުރުން ޖޯޑީ އަލްބާ އާއި ސާޖިއޯ ބުސްކެޓްސް ވެސް ހިމެނުނު އިރު، މި ތިން ކުޅުންތެރިން ވެސް ވަނީ މެޗުގެ 90 މިނެޓް ކުޅުން ފުރިހަމަކޮށްފައެވެ.

މިސީޒަނުގައި އެމެރިކާގެ މޭޖާ ލީގު ސޮކާގެ އީސްޓަން ކޮންފަރެންސްގައި ޕްލޭއޮފް އިން މި ދެޓީމަށް ވެސް ފުރުސަތު ނުލިބުނު އިރު، ނިއުޔޯކް ސިޓީ އިން ސީޒަން ނިންމާލީ 15 ޓީމު ހިމެނޭ އީސްޓަން ކޮންފަރެންސް ލީގުގެ 11 ވަނައިގައެވެ. އަދި އިންޓަ މިއާމީ އިން ސީޒަން ނިންމާލީ އީސްޓަން ކޮންފަރެންސް ލީގު ތާވަލުގެ 14 ވަނައިގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިހާފުގައި ދެޓީމުން ވެސް ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް މިމެޗުގައި ފުރަތަަމަ ލަނޑުޖަހައި ކުރިހޯދީ ނިއުޔޯކް ސިޓީ އިންނެވެ.

މިލަނޑު ފުރަތަމަ ހާފުގެ 44 ވަނަ މިނެޓުގައި ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ޓެލްސް މެގްނޯ އެވެ. މިއީ އެޓީމުގެ ޔޫއެސްއޭ ޑިފެންޑަރު ކެވިން އޯޓޫލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ނިއުޔޯކް ސިޓީ ކުރީގައި އޮވެގެންނެވެ.

މެޗުގެ ދެވަަނަ ހާފު ވެސް ވަރުގަދަކޮށް ފެށީ ނިއުޔޯކް ސިޓީ އިންނެވެ. އެގޮތުން މިހާފު ފެށިގެން ދެވަނަ މިނެޓުގައި އެޓީމުން ވަނީ އިތުރު ލަނޑެއް ކާމިޔާބުކޮށް މެޗުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އާޖެންޓީނާގެ ޒުވާން ފޯވާޑް ޖޫލިއަން ފެނާންޑޭޒް އެވެ. މިއީ އެޓީމުގެ ބްރެޒިލް ފޯވާޑް ޓެލްސް މެގްނޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އިންޓަ މިއާމީ އިން ނަތީޖާގެ ފަރަގު ކުޑަކުރި ލަނޑު ދެވަނަ ހާފުގެ 81 ވަނަ މިނެޓުގައި ކާމިޔާބުކޮށްދިނީ ޔޫއެސްއޭގެ ފޯވާޑް ރޮބީ ރޮބިންސަން އެވެ. މިއީ އެޓީމުގެ ތަޖުރިބާކާރު މިޑްފިލްޑަރު ސާޖިއޯ ބުސްކެޓްސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ނިއުޔޯކް ސިޓީ ކުރީގައި އޮވެގެންނެވެ.