ޕީޕީއެމް/ޕީއެންސީ ޓިކެޓްގައި ށ. މިލަންދޫ ދާއިރާއަށް ވާދަކުރާ ކެންޑިޑޭޓް ކަނޑައެޅުމަށް ބާއްވާ ޕްރައިމަރީގައި ވާދަކުރެއްވުމަށް ޕީއެންސީގެ ސެނެޓަރ މުހައްމަދު ނަބީލް ޒަމީލް (ނައްބެ) ނިންމަވައިފިއެވެ.

މިކަން ހާމަކުރައްވައި ފޭސްބުކްގައި ނައްބެ ކުރެއްވި ޕޯސްޓެއްގައި ވަނީ، ކުރީގެ ރައީސް ޔާމީން އަބްދުލްގައްޔޫމް ޖަލަށް ލެވުމާއެކު، މަދު ބައިވެރިންނާއި އެކުގައި، މަގުމައްޗަށް ނުކުމެ ޕީޕީއެމް/ޕީއެންސީގެ މެމްބަރުންގެ ޙައްޤުގައި އޭނާ ވަކާލާތު ކޮށްދެއްވައިފައިވާނެކަން ފާހަގަކުރައްވައިފައެވެ.

ނަބީލަކީ ރައީސް ޔާމީން މިނިވަންކުރުމަށް ގޮވާލާ ބޭއްވުނު ހަރަކާތާއި އެނޫންވެސް، ޕީޕީއެމް/ޕީއެންސީ އިދިކޮޅުގައި އޮވެގެން، ހިންގި މަގުމަތީ ހަރަކާތްތަކުގައި ވަރަށް އިސްކޮށް ބައިވެރިވެވަޑައިގެންނެވި ބޭފުޅެކެވެ. އެ ހަރަކާތްތަކުގެ ތެރޭއިން ވަރަށް ގިނަ ފަހަރު އޭނާ ވަނީ ހައްޔަރުވެސް ކޮށްފައެވެ. 

ނަބީލް އިތުރަށް ވިދާޅުވީ ކުރިއަށް އޮތީ ބުރަ މަސައްކަތެއްކަން ޤަބޫލުކޮށް އިންތިޚާބީ ރައީސް ޑރ. މުޙައްމަދު މުއިއްޒުގެ ސަރުކާރު ދިފާޢުކޮށް ރައީސް ޔާމީން އަބްދުލްޤައްޔޫމާއި ޕީޕީއެމް/ޕީއެންސީގެ ކޯލިޝަންގެ ތަސައްވުރު ހާސިލުކުރުމަށް ސަރުކާރުން މަސައްކަތް ކުރާއިރު ޤާނޫނީ ގޮތުން މަޖިލީހުގެ ޒިންމާ އަދާކޮށް، ސަރުކާރު ދިފާއުކޮށް، ޖަވަަބުދާރީކޮށް، ރައްޔިތުންގެ ހެވަށާއި ލާބައަށް އަބަދާއި އަބަދުމެ އޭނާ މަސައްކަތް ކުރާނޭ ކަމަށް ވިދާޅުވެފައެވެ. 

"އަޅުގަނޑުމެން އެންމެން ކުރި މަސައްކަތުން ގެނައި ސަރުކާރު ދިފާއުކުރެވޭނީވެސް އަޅުގަނޑުމެންނަށް. އިތުބާރުކުރައްވާ! އަޅުގަނޑަށް ތާއީދުކޮށްދެއްވާ! އަޅުގަނޑަކީ ތިޔަ ރައްޔިތުންގެ ކެންޑިޑޭޓް." ނަބީލް ވިދާޅުވި އެވެ. 

ޕީޕީއެމް/ޕީއެންސީގެ މަޖިލިސް ޕްރައިމަރީ އޮންނާނީ އަންނަ ޖެނުއަރީ މަހުގެ 20 ވަނަ ދުވަހުއެވެ.