އިޓާލިއަން ލީގުގެ އެންމެ ފަހުގެ ޗެމްޕިއަން، ނަޕޯލީގެ ކޯޗަކަށް އިޓަލީގެ ތަޖުރިބާކާރު ކޯޗު ވޯލްޓާ މަޒާރީ ހަމަޖައްސައިފި އެވެ.

2009 ވަނަ އަހަރުން ފެށިގެން 2013 ވަނަ އަހަރާއި ހަމައަށް ނަޕޯލީއަށް އިރުޝާދު ދިން، އުމުރުން 62 އަހަރުގެ މަޒާރީ ދެ ވަނަ ފަހަރަށް އެޓީމުގެ ކޯޗުކަމާ ހަވާލުވީ، ކުރިން އެ މަގާމުގައި ހުރި ފްރާންސްގެ ރޫޑީ ގާސިއާ ވަކި ކުރުމަށްފަހު އެވެ.

މަޒާރީ އެންމެ ފަހުން އިރުޝާދު ދީފައި ވަނީ އިޓަލީގެ ކަގްލިއާރީ އަށެވެ. އެ މަގާމުން އޭނާ ވަކި ކުރީ މިދިޔަ އަހަރުގެ މެއި މަހުގެ ތެރޭގަ އެވެ. އޭގެ ފަހުން މަޒާރީ ހުރީ އެއްވެސް ވަޒީފާއެއްގައެއް ނޫނެވެ.

Advertisement

2009 ވަނަ އަހަރު ނަޕޯލީ އާއި ހަވާލުވުމަށް ފަހު މަޒާރީގެ އިރުޝާދުގެ ދަށުން ނަޕޯލީ ކުޅުނު 182 މެޗުގެ ތެރެއިިން 89 މެޗުން މޮޅުވިއިރު އެޓީމު ބަލިވީ 43 މެޗުންނެވެ. އަދި އަނެއް 50 މެޗު ނިމިފައިވަނީ އެއްވަރުވެގެންނެވެ. މީގެ އިތުރުން އޭނާ ވަނީ ނަޕޯލީ އާއެކު އިޓާލިއަން ސްޕަކަޕްގެ ފައިނަލުގައި ކުޅުމުގެ އިތުރުން އިޓާލިއަން ކަޕްގެ ޗެމްޕިއަންކަން ހޯދާފައެވެ.

ނަޕޯލީގައި ހަތަރު އަހަރު ހޭދަ ކުރުމަށްފަހު، އެ ޓީމުގެ ކޯޗުކަމުން އޭނާ ދުރަށް ދިޔައީ 2013 ވަނަ އަހަރުގެ މެއި މަހުގެ ތެރޭގަ އެވެ. އޭގެ ފަހުން އޭނާ ވަނީ އިޓާލިއަން ލީގުގެ އިންޓަ މިލާން އަދި ޓޮރީނޯ އަށް ވެސް އިރުޝާދު ދީފަ އެވެ.