މި ސަރުކާރުގެ ގެދޮރުވެރިޔާ ސްކީމުގެ ދަށުން އަރބަންކޯއިން ހުޅުމާލެއިން ގޯތި ދޫކޮށްފައިވަނީ އެއްވެސް ޕްލޭނެއް ނެތި ކަމުގައި އިންތިޤާލީ ކޮމެޓީން ބުނެފިއެވެ. 

އިންތިޤާލީ ކޮމެޓީގެފަރާތުން އާންމު ޚިދުމަތްދޭ ދައުލަތުގެ ކުންފުނިތަކުން ކޮށްފައިވާ މަސައްކަތަކާއި ޚަރަދުތައް ދިރާސާ ކުރުމަށްފަހު އެކަމުގެ ތަފްސީލު ރިޕޯޓު ހާމަކުރުމަށް އިންތިޚާބީ ރައީސުލްޖުމްހޫރިއްޔާގެ އޮފީހުގައި ކުރިއަށް ދިޔަ މައުލޫމާތު ދިނުމުގެ ސެޝަންގައި އަރބަންކޯގެ މަސައްކަތްތަކަށް އަލި އަޅުވާލައި ބުނެފައިވަނީ ބިންވެރިޔާ ސްކީމުގެ ދަށުން އެއްވެސް ޕްލޭނެއް ނެތި ބިން ދޫކޮށްފައިވުމުން އިތުރަށް އިންފްރާސްޓްރަކްޗަރ ގާއިމްކުރުމަށް ދެވޭނެ ބިމެއް ނެތްކަމުގައެވެ. 

މީގެ އިތުރުން އެ ރިޕޯޓުގައި ބުނެފައިވަނީ 300000 މީހުން ޖަމާވަމުންދާ ސިޓީއަކަށް ހުޅުމާލެ ސިޓީ ވަމުން އަންނަ އިރު މަގު ހެދުމާއި މިސްކިތްތައް އަދި ގަރާޖްތަކާއި އަދި ގުދަންތައް ފަދަ އެތަކެއް އިންފްރާސްޓްރަކްޗަރތައް ގާއިމްކުރަން ޖެހޭއިރު އެކަމަށް ބޭނުންވާ ބިން އިތުރަށް ލިބެން ނެތުމަކީ ވަރަށް ބޮޑު ގޮންޖެހުމެއް ކަމުގައެވެ. 

މިއާއެކު ހުޅުމާލެއިން ދޫކުރެވިފައިވާ ފްކެޓްތަކުގައި ދިރިއުޅޭ މީހުންގެ ތެރެއިން 40 އިންސައްތަ މީހުންނަކީ ގަވާއިދުން ކުލި ނުދައްކާ މީހުންނަށް ވުމުގެ ސަބަބުން އެކަމުގެ ސަބަބުންވެސް ވަރަށް ގިނަ ފައިސާ ނުލިބި ވާކަމުގައިވެސް އެ ރިޕޯޓުގައި ބުނެފައިވެއެވެ. 

މީގެ އިތުރުން 2018 ވަނަ އަހަރު 804 މުވައްޒަފުންނާއެކު މަސައްކަތް ކުރަމުން އައި އަރބަންކޯއިން 2023 ވަނަ އަހަރައި ހަމައަށް އައިއުރޔ 2143 މުވައްޒަފުން އިތުރުވެފައިވާ ކަމަށާއި އެއީ މުވައްޒަފުންގެ އިންސައްތަ 100 އަށްވުރެ މަތި އަދަދެއްކަމުގައިވެސް އިންތިޤާލީ ކޮމެޓީގެ ރިޕޯޓުގައި ވަނީ ބުނެފައެވެ. 

ވުމާއެކު އަލަށް އެކުލަވާލާ ސަރުކާރެއްގައި މި މުވައްޒަފުން އެލޮކޭޓްކުރުމުގައި މުވައްޒަފުން އޭގެ ރަނގަޅު ގޮތުގައި ބަހާލެވިގެން ބޭނުން ކުރުމަށް ޚާއްސަ ސަމަލުކަމެއް ދޭންޖެހޭނެ ކަމުގައި އެ ރިޕޯޓުގައި ވަނީ ފާހަގަ ކޮށްފައެވެ.