ރ.އަނގޮޅިތީމު ރައްޔިތުންގެ ފަރާތުން ފަލަސްތީނަށް އެހީވުމަށް އެއް ލައްކަ ރުފިޔާ ހަދިޔާ ކޮށްފިއެވެ.

މިރުފިޔާ އަކީ ރަށުގެ ރައްޔިތުންނާއި މުއައްސަސާތަކާއި  އަންހެނުންގެ ތަރައްޤީއަށް މަސައްކަތް  ކުރާ ކޮމެޓީން ގުޅިގެން ހިންގި ހަރާކާތްތަކުގެ ތެރެއިން ލިބުނު ފައިސާ ކަމަށް ރަށުން "ވޮއިސް" އަށް މައުލޫމާތު ދެއްވި ފަރާތުން ބުންޏެވެ.

ފަލަސްތީންގެ ރައްޔިތުނަށް އެހީތެރިވުމުގެ ގޮތުން ކުރިއަށް ގެންދެވުނު ހަރާކާތް ތަކުގެ ތެރޭގައި ރަށުގެ 2 މިސްކިތުގައްޔާއި 4 ފިހާރަ އަދި 2 ކެފޭ ހިމެނޭހެން 8 ފަންޑު ފޮއްޓެއް ވަނީ ބަހައްޓާފައި އެވެ. މީގެ އިތުރުންވެސް ރަށުގެ ހުރިހާ މުއައްސަސާ ތަކެއްގެ ހުރިހާ މުއައްޒަފުންގެ މުސާރަ އާއި ރަށުގައި ހަރަކާތްތެރިވާ ދެޖަމިއްޔާ އަކުން ވެސް ވަނީ ފަލަސްތީނަށް އެހީވުމަށް ފައިސާ ހަދިޔާ ކޮށްފައެވެ. 

އެފަރާތުން ވިދާޅުވީ މި ކަންކަމުގެ އިތުރުންވެސް އިތުރުންވެސް ރަށުގެ މުއައްސަސާތަކާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީ ގުޅިގެން ވަނީ ހެދިކާ ވިއްކުން ފަދަ އިވެންޓް ތަކެއްވެސް ބާއްވާފައި ކަމަށެވެ. މިހުރިހާ ޕްރޮގްރާމް ތަކެއްވެސް ރާވާ ކުރިއަށް ގެންދިޔައީ ކައުންސިލްގެ ބެލުމުގެ ދަށުން ކަމަށް ރަށުން މައުލޫމާތު ދެއްވި ފަރާތުން ހާމަ ކުރެއްވިއެވެ.

މިކަމުގައި އެހީތެރިކަން ފޯރު ކޮށްދެއްވި އެންމެހާ ރައްޔިތުންނަށާއި އެންމެހާ މުއައްސަސާތަކަށް ކައުންސިލް ގެ ނަމުގައި ވަނީ ޝުކުރު އަދާ ކޮށްފައެވެ.

ރާއްޖޭގެ އެކި ކަންކޮޅު ތަކުން ފަލަސްތީނަށް އެހީ ވުމަށް ފަންޑްރެއިސިން އިވެންޓް ތަކެއް ބާއްވަމުން ދާކަން ފާހަގަ ކޮށްލަން ޖެހެއެވެ.