އިންތިޤާލީ އިންސާފުގެ އޮފީހުގެ ޢަމަލުތައް ކުށްވެރިކޮށް އެންޓިކޮރަޕްޝަން ކޮމިޝަނުން އެއޮފީހަށް އިންޒަރުދީ ބަޔާން ނެރެފިއެވެ.

އޭސީސީން ނެރުނު ބަޔާނެއްގައި ބުނީ، އެ ކޮމިޝަނުން ބަލަމުންދާ މައްސަލަތަކަކާއި ގުޅިގެން ތަހުގީގަށް, އިއްޔެ އިންތިގާލީ އިންސާފުގެ އޮފީހަށް އެ ކޮމިޝަނުގެ ޓީމެއް ދިޔުމުން އެ ޓީމަށް އެއްބާރުލުން ދޭން ދެކޮޅު ހަދައި، އެއްބާރުލުން ދިން މުވައްޒަފުންނަށް ފިޔަވަޅު އެޅުން ހަރުކަށި އިބާރާތުން ކުށްވެރިކުރާ ކަމަށެވެ.

އޭސީސީން ތަހުޤީޤު ކުރަމުން އަންނަނީ އެ ކޮމިޝަނުން ނިންމާފައިވާ ބައެއް ތަހުޤީޤުތަކުގެ ނިންމުންތައް ބަދަލުކުރި ކަމަށް ބުނާ މައްސަލައަކާއި އެހެން ބައެއް މައްސަލަތަކެވެ.

އޭސީސީން ބުނީ، ކޮރަޕްޝަންގެ ޢަމަލުތައް ހުއްޓުވުމަށް އެ ކޮމިޝަނުން ކުރަމުން އަންނަ މަސައްކަތްތައް ހުރަސްއަޅާ ނަމަ، ފިޔަވަޅު އަޅާނެ ކަމަށެވެ.

”އެފަދަ ތުހުމަތުތައް ބަލައި ތަހުޤީޤް ކުރުމަށް ކޮމިޝަނުން ކުރަމުން ގެންދާ މަސައްކަތަށް ގޮންޖައްސަވައި، ކޮމިޝަނުގެ މަސްއޫލިއްޔަތު އަދާކުރުމަށް ހުރަސް އަޅާ ފަރާތްތަކާ މެދު، ޤާނޫނީ އިމުގެ ތެރެއިން އެޅެން ހުރި ފިޔަވަޅު އަޅަމުން ގެންދާނަން" އޭސީސީއިން ބުނެފައިވެއެވެ.

އޭސީސީން ވަނީ އެ ކޮމިޝަނުގެ ތަހުޤީޤަށް އެއްބާރުލުން ދިން ތިން މުވައްޒަފުން "ފަސްޖެހުމެއްނެތި ޤާނޫނު ނެގެހެއްޓުމަށް" ކޮށްދިން މަސައްކަތަށް ޝުކުރު ވެސް އަދާކޮށްފަ އެވެ.

މި ތަހުޤީޤާއި ގުޅިގެން އިންތިިޤާލީ އިންސާފުގެ އޮފީހުގެ މަސައްކަތްތައް މިއަދު ބަންދުވާނެ ކަމަށް ބުނެ ރޭ ވަނީ އިއުލާނެއް ނެރެފަ އެވެ. ނަމަވެސް އޭސީސީން ބުނެފަިއިވަނީ، އެ ކޮމިޝަނުގެ ތަހުޤީޤުގައި އެ އޮފީހުގެ މަސައްކަތްތަކަށް ބުރޫއަރައި ހުރަސް އެޅޭނެ ފަދަ އެއްވެސް ކަމެއް އޭސީސީ އިން ކޮށްފައި ނޯންނާނެ ކަމަށެވެ.

އެ ކޮމިޝަނުގައި މިވަގުތު ތިއްބެވި މެންބަރުން ފާއިތުވީ އެއް އަހަރާއި އަށް މަސް ދުވަހު މަސައްކަތް ކޮށްފައިވާނީ ފަސް ޖެހުމެއްނެތި ކަމަށާއި ކުރިއަށް އޮތް ތަނުގައި ވެސް އެގޮތުގައި ދެމި ތިބޭނެ ކަމުގެ ޔަގީން ކަން ވެސް ވަނީ އެކޮމިޝަނުން ވަނީ ބުނެފައެވެ.