ފަލަސްޠީނުގެ ރައްޔިތުން ކުރަމުންދާ ހަނގުރާމައަކީ އެގައުމުގެ މިނިވަންކަމަށްޓަކައި ކުރަމުންދާ ހަނގުރާމައެއް ކަމަށާ، އަދި ފަލަސްތީނުގެ މިނިވަންކަމަށްޓަކައި މަސައްކަތް ކުރުމާ، ޓެރަރިޒަމާއި ގުޅުވިގެން ނުވާނެ ކަމަށް އިންތިޚާބީ ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
ބޭރުގެ ނޫހެއް ކަމަށްވާ ސީއެންއޭ އަށް ދެއްވި ޚާއްސަ ބަސްދީގަތުމެއްގައި ޑރ. މުޢިއްޒު ވިދާޅުވީ، ފަލަސްތީނުގެ ރައްޔިތުންގެ ހައްގު ހޯދުމަށް އެމީހުން ކުރަމުންދާ މަސައްކަތުގައި އެންމެ ފުރަތަމަ ދުވަހުން ފެށިގެން ވެސް ދިވެހިން ތިބީ އެ ގައުމާއި އެކުގައި ކަމަށެވެ.
އަމާންކަމާއި އެކު ހިތްހަމަޖެހިގެން ދިރިއުޅުމުގެ ހައްގު ފަލަސްތީނުގެ ރައްޔިތުންނަށް ލިބިގެންވޭ. 1967 ވަނަ އަހަރުގެ ބޯޑަރަށް ރުޖޫޢަވެ، ޤުދުސަކީ ފަލަސްތީނުގެ ވެރިރަށް ގޮތުގައި ހަމަޖެހި މިނިވަން ފަލަސްތީނެއް އޮތުމަކީ ދިވެހިން އެދޭ އެދުން. އަދި މިނިވަން ފަލަސްތީނެއް އޮތުމަށްޓަކައި އެމީހުން ކުރަމުންދާ މަސައްކަތުގައި ދިވެހީން ތިބީ އެގައުމާއެކު ސާބިތު ކަމާއެކު.
އިންތިޚާބީ ރައީސް ޑރ މުހައްމަދު މުއިއްޒު
މުޢިއްޒު ވިދާޅުވީ، ގައުމުގެ މިނިވަންކަމަށްޓަކައި މަސައްކަތް ކުރުމަކީ ބައިނަލްއަގުވާމީ ގާނޫނު ތަކުންވެސް ލިބިދީފައިވާ ހައްގެއް ކަމަށެވެ. އަދި އެބައެއްގެ ގައުމުގައި މިނިވަންކަމާއި އެކު ދިރިއުޅުމަކީވެސް ކޮންމެ ބަޔަކަށްވެސް ލިބިގެންވާ ހައްގެއް ކަމަށެވެ. އެހެންކަމުން ފަލަސްތީނުގެ ރައްޔިތުންނަށް ވެސް އެ ހައްގު އޮންނަންޖެހޭ ކަމަށް އެމަނިކުފާނާއި ދިވެހި ރައްޔިތުންވެސް ގަބޫލުކުރައްވާ ކަމަށް މުޢިއްޒު ވިދާޅުވިއެެވެ.
މީގެ އިތުުރުން، ފަލަސްތީނުގައި ހިނގަމުންދާ ހަނގުރާމައާއި ގުޅިގެން މުސްލިމުންނާއި ދެކޮޅު ފިކުރު ނުވަތަ އިސްލާމިފޯބިއާ ދުނިޔޭގެ އެކި ކަންކޮޅުތަކުގައި ފެތުރިގެން ހިނގައިދާނެކަމުގެ ބިރު ހީވޭތޯ ކުރި ސުވާލަށް ޖަވާބު ދެއްވަމުން މުޢިއްޒު ވިދާޅުވީ، އެ ހަނގުރާމަ ވަރުގަދަވެގެންދާ ކޮންމެ ފަހަރަކު ހަރުކަށި ފިކުރާއި މުސްލިމުންނާއި ގުޅުވައި، އިސްލާމްދީނަށް ނަފްރަތު ކުރުމުގެ ރޫހު ދުނިޔޭގެ ބައެއް ހިސާބު ތަކުގައި ފެތުރިގެން ދިޔުމަކީ އެމަނިކުފާނު ނުހަނު ކަންބޮޑުވެލައްވާ ކަމެއް ކަމަށެވެ.
ފަލަސްތީނުގެ މައްސަލަ ވަރުގަދަވެގެންވާ ކޮންމެ ފަހަރަކު އިސްލާމްދީނާމެދު ރުޅިވެރިކަން ފެތުރުމުގެ މަސައްކަތް ކުރުމަކީ ވަރަށް ކަންބޮޑުވާ ކަމެއް. އަދި ފަލަސްތީނުގެ ރައްޔިތުން އެމީހުންގެ ހައްގު ހޯދުމަށް ތެދުވާ ކޮންމެ ފަހަރަކު އިސްލާމްދީނަށް އަމާޒުކޮށް (ރުޅިވެރިކަން) އުފައްދަން މަސައްކަތް ކުރެވުމަކީ އެއްވެސް އިންސާފުވެރި ގޮތެއް ނޫން. އެހެން ވެގެން ނުވާނެ. އިސްލާމްދީނަކީ ސުލްހައިގެ ދީން.
އިންތިޚާބީ ރައީސް ޑރ މުހައްމަދު މުއިއްޒު
މުޢިއްޒު ވިދާޅުވީ ހަރުކަށި ފިކުރުގެ މީހުން ދުނިޔޭގެ ހުރިހާ ކަންކޮޅު ތަކެއްގައި ހުރިހާ ދީނެއްގައިވެސް ތިބޭ ކަމަށާށ އަދި ދީނެއް ގަބޫލުނުކުރާ މީހުންގެ މެދުގައިވެސް ހަރުކަށިފިކުރު އޮންނަ ކަމަށެވެ. އަދި އެކަންކަމަކީ ބަލައި، ހައްލު ކުރެވެންޖެހޭ ކަމެއް ކަމަށާ، އެކަމަށްޓަކައި ދުނިޔޭގެ އެހެން ގައުމުތަކާއެކު މަސައްކަތް ކުރުމަށް ރާއްޖެ ތައްޔާރަށް އޮތް ކަމަށްވެސް މުޢިއްޒު ވިދާޅުވިއެެވެ.
އެހެން ނަމަވެސް، އެކަމާއި (ޓެރަރިޒަމާ) ފަލަސްތީނު ރައްޔިތުންގެ މިނިވަންކަމަށްޓަކައި ގޮވާ ގޮވާލުމާއި، އެ މަސައްކަތާއި ގުޅުވައިގެން ނުވާނެ. ފަލަސްތީނާއި އިސްރާއިލާއި ދެމެދު އުފެދިގެން އުޅޭ މައްސަލައިގެ ފެށުމާއި އެކަމުގެ ހަގީގަތް އެންމެނަށްވެސް އެނގޭ.
އިންތިޚާބީ ރައީސް ޑރ މުހައްމަދު މުއިއްޒު
އެހެންކަމުން، ފަލަސްތީނުގެ މިނިވަންކަމަށް ގޮވާލުމާއި އެކަމަށްޓަކައި މަސައްކަތް ކުރުމާއި ޓެރަރިޒަމާއި ގުޅުވިގެން ނުވާނެ ކަމަށް މުޢިއްޒު ވިދާޅުވިއެެވެ.
Advertisement
This content is created and paid for by advertisers and does not involve Voice Journalists
