ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގެ 5 އަހަރުގެ ތެރޭގައި، ހަމައެކަނި އިންޑިޔާއާއި އެކު 100 އަށްވުރެ ގިނަ ބައިލެޓްރަލް އެއްބަސްވުން ވެފައިވާ ކަމަށް ރައީސް އޮފީހުން ހާމަކޮށްފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ އޮފީހުގެ އަންޑަރ ސެކެރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް ވިދާޅުވީ، ދިވެހިރާއްޖޭގެ ސިޔާދަތަށް އުނިކަންވާގޮތަށް އެކި ގައުމުތަކާއެކު ވެފައިވާ އެއްބަސްވުން ތަކުގެ ތެރޭގައި ހިމެނޭ، ސިޔާދަތަށް އުނިކަން ލިބޭނޭ ގޮތަށް ހުރި ނުކުތާތައް އެއްބަސްވުންތަކުން އުނިކުރުމަކީ އައު ސަރުކާރުން ކުރާނޭ މަސައްކަތެއް ކަމަށެވެ.
އަދި ބޭރު ގައުމުތަކާއި އެކު ސޯލިހުގެ ސަރުކާރުން ވެފައިވާ އެއްބަސްވުންތަކުގެ ތެރެއިންވެސް އެންމެ ބޮޑަށް ފާހަގަކުރެވެނީ އަވަށްޓެރި އިންޑިޔާއާއެކު ވެފައިވާ އެއްބަސްވުންތައް ކަން ފިރުޒުލް ފާހަގަކުރެއްވި އެވެ.
މިހާތަނަށް އެއްކުރެވިފައިވާ މައުލޫމާތަށް ބަލާއިރު، ބައިލެޓްރަލް އެއްބަސްވުން ތަކުގެ ގޮތުގައި، އިންޑިޔާއާއެކު އެކަނި، ވޭތުވެދިޔަ 5 އަހަރު ތެރޭގައި، 100 އަށްވުރެ ގިނަ ބައިލެޓްރަލް އެގްރީމެންޓް ސޮއިކުރެވިފައި އެބަހުރި. އަޅުގަނޑު މިއަދަދުގެ ތެރޭގައި މި ފާހަގަކުރަނީ ޕްރޮޖެކްޓްތައް ހިންގުމަށް ވެވިފައިހުރި އެއްބސްވުންތައް ނުހިމަނައި. ޕްރޮޖެކްޓް ތައް ހިންގުމަށް ވެވިފައިހުރި އެއްބަސްވުންތައް ނުހިމަނާ 100 އަށްވުރެ ގިނަ އެއްބަސްވުން އިންޑިއާއާއެކު ވެފައިވޭ. މިއީ ވަރަށް ބޮޑު އަދަދެއްކަން ފާހަގަކޮށްލަންޖެހޭ.
ރައީސް އޮފީހުގެ އަންޑަރ ސެކެރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް
ފިރުޒުލް އިތުރަށް ވިދާޅުވީ، އިންޑިޔާއާއެކު އެހާ ގިނަ އަދަދެއްގެ އެއްބަސްވުންތައް ވެފައިވާއިރު، އެ އެއްބަސްވުންތައް ދިރާސާ ކުރުމަށްވެސް އައު ސަރުކާރަށް ވަގުތު ބޭނުންވާ ކަމަށެވެ.
ސޯލިހުގެ ސަރުކާރުން އިންޑިޔާއާއެކު ވެފައިވާ ގޮތް ނޭނގޭ އެއްބަސްވުންތައް ހާމަކޮށް، އެ އެއްބަސްވުންތަކުގައި ހިމެނޭ، ދިވެހިރާއްޖޭގެ މިނިވަންކަމާއި ސިޔާދަތަށް ނުރައްކާވާ މާއްދާތައް އުވާލުމަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ވައުދުފުޅެކެވެ. ވެރިކަމާއި ހަވާލުވެވަޑައިގެންނެވުމަށްފަހު ވެސް އެމަނިކުފާނު މަސައްކަތް ކުރައްވަމުންދާނީ އެ ވަޢުދު ފުއްދުމަށް ކަމަށް ރައީސް އޮފީހުން ވަނީ ޔަގީންކަން ދީފައެވެ.
Advertisement
This content is created and paid for by advertisers and does not involve Voice Journalists
