ރައީސް އިބްރާހިމް މުހައްމަދު ޞާލިހުގެ ސަރުކާރަށް ނިންމާލެވިފައިވަނީ ތިލަމާލެ ބްރިޖު މަޝްރޫއުގެ އެންމެ 27 އިންސައްތަ ކަމަށް ރައީސް އޮފީހުގެ އަންޑަ ސެކެޓްރީ ފޯ ޕަބްލިކް ޕޮލިސީ މުހައްމަދު ފިރުޒުލް ވިދާޅުވެއްޖެ އެވެ. 

ތިލަމާލެ ބްރިޖު މަޝްރޫއުއަކީ ރައީސް ޞާލިހުގެ ސަރުކާރުން ފެށި އެންމެ ބޮޑު އުމްރާނީ މަޝްރޫއެވެ. ވެރިކަމުގެ 5 އަހަރު ތެރޭ އެ ބްރިޖުގެ މަސައްކަތް ނިންމަވާނެކަމަށް އެމަނިކުފާނު ވައުދުވެވަޑައިގެންނެވި ނަމަވެސް، މަސައްކަތް ޝެޑިއުލާއި އެއްގޮތަށް ކުރިއަށް ނުގެންދެވި ލަސްވެގެން ދިއުމާއި ގުޅިގެން ރައީސް ޞާލިހަށް ގިނަ ފާޑުކިޔުންތަކެއް ވެސް އަމާޒުވެގެން ދިޔައެވެ. އަދި އެއީ އެމަނިކުފާނުގެ ސަރުކާރުގެ "ފެއިލިއާ" އެއްގެ ގޮތުގައި ލޭބަލް ކުރެވިގެން ދިޔަ މަޝްރޫއަކަށް ވަނީ ވެފައެވެ. 

ނޮވެމްބަރު 17 އަށް ފަހު ވެރިކަމުގެ މަސްއޫލިއްޔަތުތަކާއި ރަސްމީކޮށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ހަވާލުވެވަޑައިގެންފައިވާއިރު، އެމަނިކުފާނު ވަނީ ތިލަމާލެ ބްރިޖުގެ މަޝްރޫއު ނިންމަވާނެކަމުގެ ޔަގީންކަން ދެއްވާފަ އެވެ. 

މިއަދު ރައީސް އޮފީހުގައި ނޫސްވެރިންގެ ބައްދަލުވުމުގައި، ނޫސްވެރިއަކު ވަނީ ތިލަމާލެ ބްރިޖުގެ މަސައްކަތް އާ ސަރުކާރުން ނިންމާލެ ތާރީޚެއް ސާފުކޮށްދެއްވުމަށާއި، އެ މަޝްރޫއު ކުރިއަށް ގެންދަވަން ރާއްވަވާފައިވާ ގޮތެއް ސާފުކޮށްދެއްވުމަށް އެދިފައެވެ. 

އެ ސުވާލަށް ޖަވާބުދެއްވަމުން ފިރުޒުލް ވިދާޅުވީ ތިލަމާލެ ބްރިޖުގެ މަސައްކަތް ޝެޑިއުލާއި އެއްގޮތަށް ކުރިއަށް ދިޔަނަމަ މިހާ ހިސާބަށް މަޝްރޫއުގެ 77 އިންސައްތަ މަސައްކަތް ހުންނާނީ ނިންމާލެވިފައި ކަމަށެވެ. އެހެން ނަމަވެސް އިންތިގާލީ މަރުހަލާގައި ހޯދުނު ހޯދުންތަކަށް ބަލާއިރު، ނިމުނު ސަރުކާރަށް ނިންމާލެވިފައި ވަނީ އެ މަޝްރޫއުގެ އެންމެ 27 އިންސައްތަ މަސައްކަތް ކަމަށް ފިރުޒުލް ވިދާޅުވި އެވެ. 

ފިރުޒުލް ވިދާޅުވީ މިހާރު ސަރުކާރުން ކުރަމުންދާ މަސައްކަތަކީ އެ މަޝްރޫއުގެ ހާލަތު ބެލުމުގެ މަސައްކަތް ކަމަށެވެ.

އަދި އެފަހުން ދެން އެ މަޝްރޫއު ކުރިއަށް ގެންދާނެ ގޮތް ރާއްވަވާނެ ކަމަށާއި، އަދި މަޝްރޫއު ނިންމާނެ ތާރީޚެއް މިހާރު ނުދެންނެވި ނަމަވެސް، ދިރާސާތަކަށް ފަހު ހާމަކުރައްވާނެ ކަމަށް އޭނާ ވިދާޅުވި އެވެ. 

އޭގެ އިތުރުން ފިރުޒުލް ވިދާޅުވީ ތިލަމާލެ ބްރިޖު މަޝްރޫއު ނުނިމި ލަސްވެގެން ދިޔަ ސަބަބުތައް ދެނެގަނެ، އެ މަސައްކަތް ކުރިއަށް ގެންދާނެ ގޮތް ރާވާލުމަކީ ރައީސް ޑރ މުއިއްޒުގެ ވެރިކަމުގެ ފުރަތަމަ 14 ހަފްތާގައި ކުރައްވާނެ ކަންކަމުގެ މަގުޗާޓުގައި ވެސް ހިމަނުއްވާފައިވާ މުހިންމު މަސައްކަތެއް ކަމަށެވެ.