ދިވެހިރާއްޖޭގެ އިގްތިސާދަށް އަވަސް ހައްލުތަކެއް އަންނާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ދިވެހި ރާއްޖެއާއި އެކު ސައުދީ އަރަބިއާއިން ވިޔަފާރީގެ އެއްބަސްވުމެއްގައި ސޮއިކުރަން އެ ގައުމުގެ ވަޒީރުންގެ މަޖިލީހުން ނިންމުމާ ގުޅިގެން ކުރެއްވި ޓްވީޓެއްގައެވެ.
"ރައީސް ޑރ މުއިއްޒުގެ ވެރިކަންފެށުމާއި އެކު އެމަނިކުފާނު ގެންދަވަނީ ރާއްޖޭގެ އިޤްތިޞާދަށްހެޔޮ އަދި އަވަސް ބަދަލުތަކެއްގެނައުމަށް ބުރަ މަސައްކަތްޕުޅުތަކެއް ކުރައްވަމުން. އިންޝާ ٱللَّٰه އަވަސް ޙައްލުތަކެއް ދާނީ ފެންނަމުން." ސައީދު ކުރެއްވި ޓްވީޓްގައި ވެއެވެ.
ސަޢޫދީ ޢަރަބިއްޔާގެ ޤައުމީ ނިއުސް އޭޖެންސީ "ވާސް" އިން ބުނެފައިވާ ގޮތުގައި،ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް ރިޔާސަތު ބެލެހެއްޓެވި މި ބައްދަލުވުމުގައި ވިޔަފާރީގެ މި އެއްބަސްވުމުގެ ފަހުމުނާމާގައި ސޮއިކުރުމުގެ މަޝްވަރާތައް ދިވެހިރާއްޖޭގެ އިކޮނޮމިކް ޑިވޮލޮޕްމަންޓް މިނިސްޓްރީއާއެކު ކުރިއަށް ގެންދަވާނީ ސަޢޫދީޢަރަބިއްޔާގެ އިކޮނޮމިކް މިނިސްޓަރު ފައިސަލް ބިން ފާދިލް އަލީ އިބްރާހިމް އާއި ފޮރިން އިންވެސްޓްމަންޓް އޮތޯރިޓީގެ ޗެއާމަން ކަމަށް ވަނީ ނިންމަވާފައެވެ.
ދާދި ފަހުން މިވަނީ ރާއްޖެއަށް ސަޢުދީޢަރަބިއްޔާއިން ކަނޑައަޅުއްވައިފައި ހުންނަވާ ސަފީރު ރައީސުލް ޖުމްހޫރިއްޔާ ޑރ.މުހައްމަދު މުއިއްޒުގެ އަރިހަށް އިހްތިރާމް ގެ ޒިޔާރަތެއް ވެސް ކުރައްވާފައެވެ. ސަޢުދީޢަރަބިއްޔާ އާއި ރާއްޖޭގެ ގުޅުން އިތުރަށް ބަދަހި ވެގެން ދާނެ ކަމަށް ރައީސް ޑރ.މުޙައްމަދު މުޢިއްޒު ވިދާޅުވެފައިކަންވެސް ފާހަގަ ކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
