ޤަވާއިދުން ޓެކުސް ނުދައްކާ ފަރާތްތަކުގެ ތެރެއިން ގިނަ ބައެއްގެ ނަންތައް މޯލްޑިވްސް އިންލޭންޑް ރެވެނިއު އޮތޯރިޓީ(މީރާ) އިން މިއަދު ހާމަކޮށްފިއެވެ.
ލިސްޓު އާއްމު ކޮށްފައިވަނީ މިއަދު މީރާއިން މިކަމާ ގުޅިގެން ކުރި ޓްވީޓެއްގައެވެ.
މީރާއިން އާންމުކޮށްފައިހުރި ލިސްޓުގައިވާ މީހުންނަކީ 2022 ވަނަ އަހަރުގެ ޖީއެސްޓީ ބަޔާން އަދި އިންކަމް ޓެކްސް ނުދައްކާ ހުރި ފަރާތްތަކެވެ. މިގޮތުން މި ލިސްޓްގައި 769 ފަރާތެއްގެ ނަން ހާމަ ކޮށްފައިވާއިރު އޭގެ ތެރެއިން 21 ފަރާތަކީ އިންކަމް ޓެކްސް ދައްކާފައިނުވާ ފަރާތްތައްކަމަށް މީރާއިން ބުނެއެވެ. އަދި ބަކީ ތިބި 748 ފަރާތަކީ ފާއިތުވެދިޔަ އަހަރުގެ ޖީއެސްޓީ ބަޔާން ހުށަހަޅާފައި ނުވާ ފަރާތްތަކެވެ.
މި ލިސްޓްގައި ރާއްޖޭގައި ހިންގާ ވަރަށް ބައިވަރު ވިޔަފާރި ތަކުގެ އިތުރުން، އާންމު ފަރާތްތަކުގެ ނަންތައް ވެސް މީރާއިން ވަނީ ހާމަކޮށްފައެވެ.
މީރާއިން މިދިޔަ އަހަރަށް ހުށަހަޅަންޖެހޭ އާމްދަނީން ނަގާ ޓެކްސް ބަޔާން ހުށަހަޅައި ފައިސާ ދެއްކުމުގެ ސުންގަޑި ޖުލައި މަހުގެ ނުވަވަނަ ދުވަހަށް ވަނީ ލަސްވެސް ކޮށްދީފައެވެ.
މިފަދަ ހާލަތް ތަކުގެ ދަށުން މީރާއިން ބޭނުން ކުރަމުން އަންނަ އެންފޯސްމަންޓް ޕޮލިސީގެ ދަށުން މީގެ ކުރިންވެސް ޓެކްސް އަދި މީރާއަށް ދައްކަންޖެހޭ ފައިސާއެއް ދައްކާފައި ނުވާނަމަ އެ ފައިސާ ނުދައްކާ ފަރާތްތަކުގެ މައުލޫމާތު މީރާއިން ހާމަކޮށް، ފައިސާ ދެއްކުމަށް މަޖުބޫރުކުރުމުގެ ގޮތުން އެހެން ފިޔަވަޅުތައްވެސް މީރާއިން އަޅަމުން ގެންދެއެވެ.
Advertisement
This content is created and paid for by advertisers and does not involve Voice Journalists
