ޖަލުގައި ހުންނެވި، ޕާކިސްތާނުގެ ކުރީގެ ބޮޑުވަޒީރު ޢިމްރާން ޚާން އަންނަ ހަފްތާގައި ކޯޓަށް ހާޒިރުކުރުމަށް ޕާކިސްތާނުގެ އިސްލާމްއާބާދުގައި ހުންނަ ޚާއްސަ ކޯޓުން އަންގައިފިއެވެ.
އަލްޖަޒީރާގައި ބުނެފައިވަނީ ޕާކިސްތާނުގެ ސަރުކާރުގެ ސިއްރުތަކެއް ފާޅު ކުރި ކަމުގެ ތުހުމަތުގައި ޢިމްރާން ޚާން ހާޒިރުކުރުމަށް އަންގައިފައިވަނީ ޕާކިސްތާނުގެ އޮފިޝަލް ސީކްރެޓްސް އެކްޓްގެ ދަށުން ޤާއިމް ކޮށްފައިވާ ޚާއްސަ ކޯޓަކަށެވެ.
ޢިމްރާން ޚާންގެ އިތުރުން ޕާކިސްތާނުގެ ކުރީގެ ފޮރިން މިނިސްޓަރ ޝާޙް މަހްމޫދް ޤުރައިޝީ ވެސް އެކޯޓަށް ހާޒިރުކުރުމަށް ވެސް ވަނީ އަންގައިފައެވެ. ޝާޙް މަޙްމޫދްވެސް ހުންނެވީ ޖަލު ބަންދުގައެވެ.
ކޯޓު އަމުރުގެ ދަށުން ޢިމްރާން ޚާން ކޯޓަށް ހާޒިރު ކޮށްފިނަމަ އެފެނިލުން ވެގެންދާނީ އޮގަސްޓު މަހު ޢިމްރާން ޚާން ޖަލުބަންދަށް ގެންދިޔަ ފަހުން ޢާންމުކޮށް ފެނިގެންދާނެ ފުރަތަމަ ފެނިލުމަށެވެ.
އޮގަސްޓު މަހު ޢިމްރާން ޚާން ޖަލުގައި ބަންދު ކޮށްފައިވަނީ ޕާކިސްތާނުގެ ސަރުކާރަށް ބޭރުގެ ޤައުމުތަކުން ހަދިޔާގެ ގޮތުގައި ލިބުނު ތަކެތި ޢިމްރާން ޚާން 2018 ވަނަ އަހަރުން 2022 އާއި ހަމައަށް ބޮޑުވަޒީރު ކަން ކުރި ދުވަސްވަރު، ޤާނޫނާއި ޚިލާފަށް ވިއްކި ކަމުގެ ތުހުމަތުގައެވެ.
ޢުމުރުން 71 އަހަރުގެ ޢިމްރާން ޚާން ޕާކިސްތާނުގެ ބޮޑު ވަޒީރުކަމުން ދުރުކޮށްފައިވަނީ ޕާކިސްތާނުގެ ޤާނޫނު ހަދާ މަޖިލީހުން އޭނާގެ އިތުބާރުނެތް ކަމުގެ ވޯޓު ނަގައިގެން 2022 ވަނަ އަހަރުގެ އޭޕްރީލް މަހުއެވެ.
Advertisement
This content is created and paid for by advertisers and does not involve Voice Journalists
