ހައްދުފަހަނައަޅާފައިވާ އިސްރާއިލުގެ ޒަޔަނިސްޓުން ފަލަސްޠީނުގައި ހިންގަމުންދާ ގަތުލުޢާއްމު 4 ދުވަހަށް މެދުކަނޑަލައިފި އެވެ.

އިސްރާއީލުން ހިންގަމުންދާ ލާއިންސާނީ ޖަރީމާތައް 4 ދުވަހަށް މެދުކަނޑާލާފައި މިވަނީ ޔަހޫދީންނާއި، ފަލަސްތީނުގެ މިނިވަންކަމަށްޓަކައި ޖިހާދު ކުރަމުންދާ މުޖާހިދުންނާއި ޤަޠަރާއި މިޞްރު އަދި އެމެރިކާ މެދުވެރިވެގެން ދެކެވުނު ވާހަކަތަކަށްފަހު ވެވުނު އެބަސްވުމަކަށްފަހުގައެވެ. 

އެ އެއްބަސްވުމުގައި ވާގޮތުން، ހަނގުރާމަ މެދުކަނޑާލާފައި މިވާ ވަގުތުގައި އިޒްރާއިލްގެ ޔަހޫދީ ސިފައިން ރަހީނުކޮށްފައިވާ ފަލަސްޠީނުގެ މުސްލިމުންގެ ތެރެއިން އަންހެނުންނާއި ކުޑަކުދިން ހިމެނޭހެން 150 މީހުން ދޫކޮށްލަންޖެހެއެވެ. އަދި ފަލަސްޠީނުގެ ހަމާސްގެ ޖަމާއަތުގެ މުޖާހިދުން ރަހީނު ކޮށްފައިވާ އިޒްރާއިލްގެ ރައްޔިތުންގެ ތެރެއިން 50 މީހަކު ދޫކޮށްލަންޖެހެއެވެ. 

Advertisement

މީގެ އިތުރުން، ގަތުލުޢާއްމު މެދުކަނޑައިލާފައިވާ 4 ދުވަހުގައި ޣައްޒާއަށް އިންސާނީ އެހީގެ 300 އެއްހާ ޓްރަކް ވެއްދުމަށްވެސް ވަނީ ޝަރުތުކޮށްފައެވެ. 

އިޒްރާއިލްގެ ނިރުބަވެރި ބޮޑުވަޒީރު ނަތަންޔާހޫ ބުނެފައިވަނީ ހަނގުރާމަ މެދުކަނޑާލުމުގެ މާނައަކީ ހަނގުރާމަ އެއްކޮށް ހުއްޓައިލުން ނޫން ކަމަށާއި މެދުކަނޑާލަން ބުނެފައިވާ މުއްދަތު ފާއިތުވުމުން ހަމަލާތައް ފަށާނެ ކަމަށެވެ.

އިޒްރާއިލުން ފަލަސްޠީނާއި ދެކޮޅަށް ހިންގަމުންދާ ގަތުލު އާއްމަށް 48 ދުވަސް ވެފައިވާއިރު، މި ގަތުލުއާންމުގެ ތެރެއިން 11,000 އަށްވުރެ ގިނަ މުސްލިމުން ވަނީ ޝަހީދުވެފައެވެ. މީގެ ތެރެއިން ބޮޑު އިންސައްތައަކީ އަންހެނުންނާއި ކުޑަކުދިންނެވެ.